Фәйзуллиннар гаиләсе – ГТО чемпионнары!

Нәрсә ул гаилә командасы? Бу – дүрт кешедән торган чын спорт династиясе: 8-11 яшьлек бала, 25-49 яшьлек әти-әни һәм 50-69 яшьлек әби яки бабай. Биредә җиңүгә омтылыш кына түгел, ә буыннар бердәмлеге, гаилә кыйммәтләре һәм сәламәт яшәү рәвеше сынала.

Фестиваль киеренке көрәштә үтте. Беренче көнне тантаналы ачылыш һәм эстафета узды, анда спортчылар үзләренең физик әзерлеген генә түгел, ә гаиләдәге бердәмлекне дә күрсәтте. Икенче көнне катнашучылар гомуми физик әзерлек буенча нормативлар тапшырды, шул исәптән йөгерү һәм пневматик коралдан ату буенча да көч сынашты. Соңгы, өченче көнне исә йөзү буенча ярышлар узды, анда өлкән буын вәкилләре аеруча зур активлык күрсәтте.

 Өч көн дәвамында барган киеренке ярышлардан соң иң дулкынландыргыч мизгел – бүләкләү тантанасы җитте. Нәтиҗәләр буенча, Октябрьскийдан Фәйзуллиннар гаиләсе кабат җиңү пьедесталының иң югары баскычына күтәрелде!

Без үзебезнең чемпионнарыбызны чын күңелдән котлыйбыз! Аларның көче, бердәмлеге һәм спортка булган мәхәббәте барыбыз өчен дә үрнәк.