Өлкән яшьтәге кешеләр өчен «Алтын яшьне саклап» куркынычсызлык мәктәбе

Җирле халык өчен шәһәрнең эчке эшләр бүлеге начальнигы вазыйфаларын башкаручы полиция полковнигы Рөстәм Әсхәдуллин һәм аның урынбасары эчке хезмәт подполковнигы Айдар Төхбәтуллин әңгәмә үткәрде.

Очрашу өлкән яшьтәге кешеләрнең мошенниклыкның киң таралган схемалары һәм алардан саклану ысуллары турында хәбәрдарлык дәрәҗәсен арттыру максатыннан оештырылды. Полиция хезмәткәрләре җинаятьчеләр куллана торган төрле алдаулар, шул исәптән телефон мошенниклыгы, фишинг сайтлары һәм башка хәйләләр турында җентекләп сөйләделәр.

Аферистларның корбаны булмас өчен, саклык чараларына аерым игътибар бирелде. Рөстәм Ильяс улы шикле хезмәт тәкъдим итүче яисә алдан түләүне таләп итүче таныш булмаган кешеләргә карата тәнкыйди фикерләүнең һәм ышанмауның мөһимлеген ассызыклады. Айдар Айрат улы, үз чиратында, шик-шөбһә туган очракта, мәгълүматны тикшерү һәм туганнар яки хокук саклау органнары белән киңәшләшү кирәклегенә басым ясады.

Чара барышында катнашучылар үзләрен кызыксындырган сорауларны бирделәр һәм Эчке эшләр министрлыгы вәкилләреннән квалификацияле җаваплар алдылар. «Алтын яшьне саклап» куркынычсызлык мәктәбе өлкән яшьтәге гражданнарның иминлеген тәэмин итүдә һәм мошенниклар җинаятьләрен кисәтүдә мөһим адым булды, дип хәбәр итте Русия Эчке эшләр министрлыгының Октябрьский шәһәре буенча бүлеге.