Герой даны мәңгелек

Ел саен 4 сентябрьдә Октябрьский шәһәрендә патриот шагыйрь Мөҗәһит Хәйретдиновны искә алалар.
Быел да Төрекмәндә, герой якташыбыз һәйкәле янындагы традицион митингка аның туганнары, бистәдә яшәүчеләр, 18нче мәктәп укучылары җыелды.
Чарада шәһәр хакимияте башлыгы урынбасары Октябрь Латыйпов, сугыш, хезмәт, Кораллы көчләр һәм хокук саклау органнары ветераннары советы президиумы әгъзасы, ветераннар комитеты рәисе, шәһәрнең мактаулы гражданины Мәсгут Галләмов һәм Төрекмән бистәсе ветераннар советы рәисе Фәнүр Бәшәров чыгыш ясады.
1944 елның 4 сентябрендә «Дахау» концлагеренда­ һәлак булган шагыйрь һәм сугышчы полковник Мөҗәһит Хәйретдиновның йөрәге тибүдән туктаганга 81 ел узса да, якташлары аны хөрмәт белән искә ала. Октябрьскийлылар аның батырлыгын, шигъри юлларын онытмый.
Бу көнне Мөҗәһит Хәй­ретдинов һәйкәле янында аның исемендәге бәйгедә җиңүчеләр бүләкләнде.
Конкурсның төп бүләгенә хәрби хәрәкәтләрдә катнашучыларга ярдәм иткән, гражданлык позициясен форма­лаштыру буен­ча мә­дәни‑агарту һәм ватан­пәрвәрлек эшчәнлеге өчен «Оберег» волонтерлар төр­кеме (җитәкчесе К. Вельбой) лаек булды.
«Безнең заман геройлары» номинациясендә I дәрәҗә лауреат дипломына ия булдылар:
‑ Вячеслав Калинин «Сок жизни» китабы өчен;
‑ Русия Язучылар берлеге­нең Татарстан бүлек­чәсе каршындагы «Илһам» тө­бәк әдәби берләшмәсе Хәй­ретдинов музее турындагы китап өчен.
«Яшь гвардия» номинация­сендә I дәрәҗә лауреат дипломы белән 15нче балалар бакчасы хезмәткәре Ольга Мороз тәбрикләнде. Ул конкурска яшьләрне патриотик тәрбияләү буенча «Орлята‑дошколята» автор­лык эшен тәкъдим иткән.
Митингка җыелучылар герой якташыбызны бер минут тынлык белән хөрмәт­ләделәр. Чара Мөҗәһит Хәйрет­­динов һәйкәленә чә­чәк­ләр салу белән тәмам­ланды.