Мәктәптә - яшьләр

«Укучыны фән ярдәмендә тәрбияләргә теләсәң — үз фәнеңне ярат, аны бел, һәм укучылар фәнне яратырлар, һәм син аларны тәрбияләрсең», — дип киңәш иткән педагогларга Л.Н. Толстой.

Бу киңәшне гамәлдә 10 нчы мәктәпнең яшь педагогы Диана Черновада күрергә мөмкин. Югары сыйныфларда ук Диананың кызыксынулары һәм мавыгулары ачыкланган, алар соңыннан тормыш юлын сайлау өчен нигезгә әверелгән. Ул дәүләтебез тарихы турындагы китапларны мавыгып укыган, фәнни олимпиадаларда, конкурсларда һәм конференцияләрдә җиңгән. Бу белемнәрне тирәнәйтергә һәм бу эшчәнлек өлкәсенең аңа никадәр якын булуын аңларга ярдәм иткән.

Диана Викторовна мәктәптә инде өченче ел тарих укытучысы булып эшли. Яшь педагог үз эшендә алдынгы методикаларны уңышлы куллана һәм белем бирү процессының иң мөһиме — укучыларны актив танып-белү эшчәнлегенә җәлеп итү дип саный. Мәктәп укучылары заманча гаджетлар белән теләп эшли, бу исә аларның укуга мотивациясен арттыра.

Уңышлы укытуның төп факторларының берсе итеп Диана Викторовна укучылар белән уртак тел таба белүне саный. Күзаллавынча, замана балалары,  мәгълүмат шунда ук, мизгел эчендә тарала торган цифрлы дөньяда яши. Шуңа күрә балаларга аңлаешлы телдә сөйләү мөһим. Укытучы эшендә уен элементларын куллана, үзе белем бирү квестлары һәм викториналар төзи, бу материалны яхшырак үзләштерергә ярдәм итә. Нәтиҗәләр практикада күренә: Диана Викторовнаның укучылары конкурсларда һәм олимпиадаларда актив катнаша, призерлар һәм җиңүчеләр була.

Педагог үзе дә квалификациясен күтәрү өстендә даими эшли. Ул икенче югары белем ала, курсларда осталыгын камилләштерә. Яңа заман укытучысы буларак, Диана Чернова һәр укучыда уникаль шәхесне күрә һәм үстерә, катлаулы педагогик бурычны хәл итә.

Яшь булуына һәм эш тәҗрибәсе зур булмаса да, Диана Викторовна хезмәттәшләренең, ата-аналарның хөрмәтен казана. Ә укучылар аны бик яраталар. Нәкъ менә шундый яшь белгечләр укытучы эшен популяр итә, һөнәргә игътибарны җәлеп итә, аның заманча шартлардагы әһәмиятен һәм кыйммәтен күрсәтә.

Фото шәһәр хакимите битеннән