Октябрьскийда 2027 елда күп функцияле йөзү бассейны ачылачак

5 сентябрьдә Башкортстан Башлыгы Радий Хәбиров эш сәфәре белән Октябрьскийда булды. Ул дәүләт-шәхси партнерлык механизмы ярдәмендә «Спортны сайлыйм (Бизнес-спринт)» федераль проекты кысаларында төзелә торган йөзү бассейны мәйданчыгын карады. Республика җитәкчесе төзелеш-монтаж эшләренең барышы һәм булачак спорт объектының мөмкинлекләре белән танышты.

Исегезгә төшерәбез, гомуми мәйданы 11 мең квадрат метрдан артык булган комплекс төзелеше 2024 елда старт алды. Проект үз эченә түбәндәгеләрне ала:

50 метрлы йөзү бассейны;
термаль СПА-комплекс;
универсаль спорт заллары;
84 номерга исәпләнгән кунакханә.

Шулай итеп, Октябрьскийда спорт һәм ял белән шөгыльләнү өчен күп функцияле үзәк формалашачак. Бассейнны 2027 елда файдалануга тапшыру планлаштырыла.

Төбәк башлыгы социаль объектлар төзүдә дәүләт-шәхси партнерлык инструментларының нәтиҗәлелеген югары бәяләде.

– Октябрьский һәрвакыт спорт шәһәре булды. Мин үзем дә балачакта монда көрәш буенча ярышларга килә идем, – дип билгеләп үтте Радий Хәбиров. – «Бизнес-спринт» проекты ярдәмендә мондый зур заманча объектлар төзү өчен кирәкле озак вакытлы инвестицияләр барлыкка килә.

Төзелеп килүче комплекс шәһәр халкы һәм анда яшәүчеләр өчен генә түгел, ә бөтен республика өчен спорт инфраструктурасын үстерүдә мөһим адым булачак. Бу проект яшь буынны сәламәт яшәү рәвешенә җәлеп итүдә, шулай ук профессиональ спортчылар әзерләү өчен лаеклы шартлар тудыруга юнәлдерелгән.

Фото: Глава.рб сайтыннан