Мәктәпне тәмамлаган кыз 8 миллион сумнан артык акчасын мошенникларга күчергән

Уфада яшәүче 18 яшьлек алданган кыз полициягә гариза белән мөрәҗәгать иткән. Эчке эшләр министрлыгыннан хәбәр итүләренчә, вакыйга мессенджерлардагы хәбәрләрдән башлана. Билгесез затлар кызга товар китерелүе һәм аны алу өчен код әйтергә кирәклеге турында хәбәр итәләр. Нинди товар килде икән дип кызыксынып, ул кодны әйтеп бирә.

Шуннан соң аның белән Үзәк банк хезмәткәрләре булып үзләрен таныштырган кешеләр элемтәгә чыга. Алар кызның исәп-хисаплары ватылуын ышандыралар һәм акчаларны «имин исәпкә» күчерергә кушалар, шул ук вакытта булган хәлләр турында беркемгә дә сөйләмәскә таләп итәләр. Шушы сылтау белән кыз мошенникларга үзенең шәхси тупланмаларыннан 145 мең сум акчасын күчерә. Караклар моның белән генә тукталып калмый: алга таба алар Федераль иминлек хезмәте (ФСБ) хезмәткәрләре булып таныштыралар һәм акча күчерү сәбәпле, кыз дустанә булмаган илләргә финанс ярдәме күрсәткән һәм аңа хәзер җинаять җаваплылыгы яный дип белдерәләр.

Психологик басым ясауларын дәвам итеп, җинаятьчеләр уфалыдан 200 мең сумнан артык кредит алдырып, бу акчаларны үзләренә күчертәләр. Моннан тыш, ул мошенникларга әтисенең шәхси тупламаларыннан 6 миллион сумнан артык акча, шулай ук 1,5 миллион сумнан артык бәядәге криптовалюта күчерә. Әлеге факт буенча «мошенниклык» маддәсе нигезендә җинаять эше кузгатылган.