Владимир Путин Курил утрауларында булды

Русия Президенты Владимир Путин Курилның Итуруп утравына килеп, «Ясный» балык заводында булган. Владимир Путин балык заводы эше белән танышкан, хезмәткәрләр белән аралашып, коллектив белән фотога төшкән. Шулай ук, аны балык уылдыгы белән сыйлаганнар.

Аннары Президент Курил үзәк район дәваханәсен караган. Дәвалау учреждениесе Сахалин өлкәсенең Курил районы халкына тәүлек буе амбулатор-поликлиника, стационар, ашыгыч һәм кичектергесез медицина ярдәме күрсәтә.

Дәүләт башлыгы Русия Герое Эдуард Норполов исемендәге урта гомуми белем бирү мәктәбендә булган. Анда спорт залын һәм сыйныфларны, мәктәп музеен караган, укучылар белән аралашкан.

Эш сәфәре ахырында Владимир Путин Сахалин өлкәсе губернаторы Валерий Лимаренко белән очрашкан.

Русия лидеры беренче тапкыр шәхсән үзе Курил утрауларына килгән. Моңа кадәр ил җитәкчеләре Курилда нибары биш тапкыр булган.

Чыганак: «Кызыл таң»

Автор:Алсу Ибрагимова

Читайте нас

Редакцияне сайлау