Мошенниклар СВО катнашучысының тол хатыныннан өч миллион сум акча урлаганнар

Уфада яшәүче 39 яшьлек хатын-кыз полициягә мөрәҗәгать итеп, акчасын мошенниклар кулыннан югалтуын хәбәр иткән. Билгесез кеше аңа ъзен Русия Оборона министрлыгы хезмәткәре дип таныштырып шалтыраткан һәм үлгән иренә тиешле җир участогын рәсмиләштерүдә ярдәм тәкъдим иткән. Документларны теркәр өчен ул хатын-кыздан СМС-кодны сораган.

Шуннан соң аның белән, янәсе, «Дәүләт хезмәтләре», Үзәк банк һәм ФСБ вәкилләре элемтәгә кергән. Аферистлар уфалыны бөтен акчасын счеттан алырга һәм аларны «ышанычлы кешегә» тапшырырга күндергән. Зыян күләме өч миллион сумнан артып киткән.

Бу факт буенча аеруча зур суммада мошенлык турында җинаять эше кузгатылган. Хәзерге вакытта полиция хезмәткәрләре тикшерү-оператив чаралар үткәрә.

Хокук саклау органнары хезмәткәрләре махсус хәрби операциядә катнашучыларның туганнарын игътибарлы булырга чакыра:

• Чит кешеләр белән түләүләр алу нечкәлекләре, счетларда зур суммалар булу яки гаиләгә тиешле ташламалар турында фикер алышмагыз. Хәтта әңгәмәдәшләр үзләрен социаль хезмәткәрләр, Оборона министрлыгы яки башка ведомстволар вәкилләре дип таныштырсалар да.
• Җир участокларын рәсмиләштерү, компенсацияләр һәм социаль ярдәмнең башка чаралары мәсьәләләрен бары тик профильле ведомстволарга шәхсән килеп яки «Дәүләт хезмәтләре» порталында расланган шәхси кабинет аша гына хәл итегез.
• Берәүгә дә СМС-хәбәрләрдән раслау кодларын һәм башка конфиденциаль мәгълүматны әйтмәгез.
• Сезне шикле шалтыратулар борчый икән, сөйләшүне кичекмәстән өзегез һәм 102 яки 112 телефоннары буенча полициягә мөрәҗәгать итегез.