Төп байлык – кешеләр

Бәйрәм кунакларын хакимият башлыгы урынбасары Октябрь Латыйпов сәламләде.
Котлау­ларны башлап Октябрь Рәис улы Федоровлар гаиләсен тәбрик итте. Алты бала әнисе Альбина Азат кызы «Ана даны» медале белән бүләкләнде.
– Бу көнне озак көттем һәм мин бик шат! Зур гаилә турында хыяллансам да, бу кадәр үк булыр дип уйламаган идем, – дип елмайды бәхетле хатын-кыз. – Әмма якын кешеләремнең ярдәме һәм хуплавы күп бала анасы булудан куркып калмас өчен яхшы нигез булып хезмәт итте. Әлбәттә, олы гаиләнең шатлыклары да, борчу-мәшәкатьләре дә җитәрлек. Без беренче чиратта балаларыбызда үзара хөрмәт һәм ярату хисе тәрбияләргә тырышабыз. Шул чакта гына алар бер-берсен тоеп һәм аңлап, тату һәм ярдәмләшеп яшәргә сәләтле кешеләр булып үсәчәкләр.
Тантанага чакырылган башка гаиләләр дә катлаулы тормыш юлыннан матур итеп атлаулары белән генә түгел, ә озак еллар дәвамында бер үк хезмәт коллективында эшләүләре белән дә игътибарны үзләренә җәлеп итте.
«Пакер» фирмасында Ольга һәм Василий Ткачевлар 15 елдан артык эшли. Василий Анатольевич – электромонтер. Ольга Александровна – ашханәдә пешекче. Ткачевлар гаиләсе тәртипле һәм хезмәт сөючән. Ир белән хатын балаларын да үз үрнәкләрендә тәрбияли.
Лилия һәм Венер Яһудин­нарны Октябрьскийда гына түгел, аның чикләрендә дә күпләр белә. Алар шәһәренең 1нче хастаханәсендә эшләүче хөрмәтле табиблар. Лилия Хәниф кызы һәм Венер Миңлемөхәммәт улы олы тормыш юлыннан 36 ел кулга-кул тотынып атлыйлар. Һәм бәхетле гаилә коруның серен дә алар бик яхшы белә булып чыкты.
– Үзара хөрмәт, ышаныч һәм мәхәббәт. Шушы сыйфатлар булса, тормыш юлында туган барлык сорауларны да чишәргә мөмкин. Кайдадыр дәшмисең, кайдадыр уртага салып сөйләшәсең... Сабырлык һәм акыл булганда, башсызлыкка юл куелмый, – дип уртаклашты табиб травматолог-ортопед Венер Яһудин.
Ир белән хатынның тагын бер яхшы гадәте бар – алар эштәге проблемаларны йортка төяп кайтмый. «Кеше өендә, гаиләсе янында ял итәргә тиеш. Чөнки иртән тагын эшкә барырга кирәк. Һәм начар кәеф белән түгел, ә күтәренке рух белән. Чөнки, асылда, табибларны һәр көнне яңа язмышлар, диагнозлар һәм дәвалау процедуралары көтә», – дип ассызыклады акушер-гинеколог Лилия Хәниф кызы.
Докторларның авыр эш көннәреннән соң җаннарын ял иттерә торган шөгыльләре дә бар икән: гаилә башлыгы балык тотарга ярата, аның сөйкемле хатыны бакчада эшләүдән күңел ләззәте таба.
Кызлары Регина да ата-анасы юлыннан киткән. Уллары Азамат – башка һөнәр иясе. Тик ул да, кешеләр үзләрен рәхәт тойсын өчен, аларның йортларын яктылык һәм җылылык белән тәэмин итү өлкәсендә мәшгуль.
Ирина һәм Альберт Идрисовлар шулай ук ак халатлы фәрештәләр. Моннан 33 ел элек язмышларын уртак иткән ир белән хатынны башкара торган хезмәтләре дә берләштерә. Алар 30 елдан артык медицина тармагында – Октябрьскийның 1нче хастаханәсендә эшли. Альберт Филарет улы – табиб-анестезиолог-реаниматолог. Ирина Илгиз кызы – табиб-педиатр. Кызлары Камилә – нур диагностикасы табибы, аның тормыш иптәше Уфа шәһәрендә табиб-фтизиатр.
Бу көнне тагын бер табиблар гаиләсе хөрмәтләнде – Шәрәфетдиновлар 1нче шәһәр хастаханәсендә эшли. Әнвәр Рәшит улы – колопрок­толог, Регина Ринат кызы – ультратавыш диагностикасы белгече, хәзерге вакытта декрет ялында.
Ксения Материнская һәм Виталий Кунафин – яшь һәм спортчы гаиләсе. Алар 4нче спорт мәктәбендә хезмәт куя. Виталий Юрьевич – тренер-укытучы, футбол буенча Башкортстан Республикасы чемпионы. Ксения Владимировна – спортчы-инструктор, пауэрлифтинг буенча Русиянең халыкара класслы спорт мастеры. Ир белән хатын ул үстерә.
Оксана һәм Вячеслав Колесовлар – 29 ел никахта. Алар музыка көллиятендә эшли. Вячеслав Владимирович егерме ел машина йөртсә, Оксана Николаевна 2002 елдан алып китапханәче булып хезмәт куя.
Ирина һәм Андрей Керн – үзәк шәһәр китапханәсе хезмәткәрләре. Андрей Александрович автоматлаштыру бүлеге мөдире булып эшли. Ул үзен компьютер техникасы һәм астрономия өлкәсендә тирән белемле кадр итеп таныткан. Ирина Азамат кызы – китапханәче. Ир белән хатынны хезмәттәшләренә һәм килүчеләргә карата яхшы һәм әдәпле мөнәсәбәтләре дә аерып тора.
– Герасимовлар берлегенә – 31 ел. Алар һөнәри парт­нерлыкны гармонияле рәвештә берләштергән нык­лы гаиләнең лаеклы үрнәге. Рәзинә Җәүдәт кызы – кече тәрбияче, Владимир Романович каравылчы булып эшли. Ир белән хатын ата-ана бурычын да лаеклы үти: ике бала тәрбияләп, аларга дөрес тормыш ориентирларын тапшырган, – дип билгеләп үтте тантананы алып баручылар.
Наилә һәм Руслан Йосыповлар «Альтернатива» заводында 16 елдан артык хезмәт куя. Руслан Азат улы – инженер, Наилә Наил кызы – цех бригадиры. Алар үз эшләренең чын остасы. Энергияләре ташып торган ир белән хатынның тормышында 2026 ел тагын бер күркәм дата белән истә калачак: Йосыповлар гаиләсенә – 25 ел – көмеш туй! Алар йорт салган, агач утырткан, балалар үстергән. Хәзер нәкъ менә үзләре өчен яшәргә вакыт җиткән.
Быел 80 еллык юбилеен бәйрәм итүче Октябрьский нәкъ менә шундый хезмәт сөючән һәм гаилә җанлы кешеләре белән көчле һәм күркәм!