Сак булыгыз, хокук саклау органнары исеменнән мошенниклык схемалары

Шуңа бәйле рәвештә гражданнарның тагын бер кат аеруча уяу булырга тиешлеген искәртәбез. Иң киң таралган алдау схемаларының берсе — телефон номерларын алыштырып күрсәтү системаларын куллану. Мондый очракта мошенниклар төрле номерлардан бер-бер артлы берничә тапкыр шалтыратырга мөмкин.

Нәтиҗәдә телефон экранында ялган номер күрсәтелә. Махсус программалар ярдәмендә шалтыратуны кабул итүче абонент экранында теләсә нинди номерны күрсәтеп була, һәм бу аны ялгыш фикергә китерә.

Мәгълүматны ачыклау өчен дәүләт органнарының һәм банк оешмаларының рәсми сайтларында күрсәтелгән телефон номерларын үзегез, кулдан җыеп шалтыратырга кирәк.

ФСБ һәм алдан тикшерү үткәрү вәкаләтләренә ия башка хокук саклау органнары хезмәткәрләре беркайчан телефон аша да шәхси мәгълүматлар, банк реквизитларын, счетлар яки пластик карталар турында мәгълүмат сорамый. Исегездә тотыгыз,
хокук саклау органнары хезмәткәрләре — ФСБ, Тикшерү комитеты, Эчке эшләр министрлыгы, Росгвардия һәм башка ведомстволар вәкилләре — нинди дә булса счетларга акча күчерүне таләп итми.
Мондый үтенечләр, шул исәптән акча күчерү юлы белән «җинаятьчеләрне тотуда ярдәм итү» яки «акчаларны саклап калу» тәкъдимнәре, мошенниклык билгеләре булып тора һәм алар турында кичекмәстән хокук саклау органнарына хәбәр итәргә кирәк.
Үзләрен тикшерүче яки башка вазыйфаи затлар итеп таныштырган кешеләр еш кына сүзләрен ялган документлар белән ныгыта һәм төрле сәбәпләр белән акча күчерүне кабат таләп итә. Алар шулай ук ачык чыганакларда булган мәгълүматларны, шул исәптән гражданинның яшәү адресын да кулланырга мөмкин.

Мондый хәбәр һәм документлар алынган очракта, тиешле дәүләт органы яки финанс оешмасы белән аларның рәсми сайтларында урнаштырылган контактлар аша мөстәкыйль рәвештә элемтәгә керергә һәм мәгълүматның дөреслеген тикшерергә кирәк.

Шуны истә тотыгыз: гражданин мәгълүматны мөстәкыйль рәвештә тикшерергә тырышканда, мошенниклар еш кына басым ясый башлый. Алар янап яки адап, ведомстволарга мөрәҗәгать итү «мәгълүматны фаш итүгә һәм җаваплылыкка тартылуга» китерәчәк, дип әйтергә мөмкин. Мондый белдерүләрнең хокукый нигезе юк һәм алар бары тик куркыту өчен генә кулланыла.

Тагын бер кат ассызыклыйбыз: телефон мошенникларының янауларына һәм үгетләүләренә бирешмәгез, акча күчермәгез һәм мондый фактлар турында хокук саклау органнарына шәхсән хәбәр итегез.

Әгәр сөйләшүче үзен дәүләт органы хезмәткәре дип таныштырса, мәгълүматны рәсми кайнар линияләр аша һичшиксез тикшерергә кирәк. Федераль куркынычсызлык хезмәте исеменнән шалтыратулар булган очракта, региональ идарәләрнең рәсми сайтларында урнаштырылган контакт телефоннарын, шулай ук Башкортстан Республикасы буенча идарәсенең ышаныч телефонын куллану киңәш ителә:  +7 (347) 273-73-72.