«Сугышлар кабатланмасын...»

Быел илебез халкы Бөек Ватан сугышында Җиңүнең 74 еллыгын билгели.
Бәйрәм көне якынлашкан мизгелләрдә шәһәребездә күп чаралар оештырылды.
Җиңү иреклеләре Бөек Ватан сугышында катнашкан якташларны тәбрикләп, чагу чәчәкләр, элекке еллардагы очрашуларны чагылдырган фотосурәтләр тапшырды.
«Бәйрәм алдыннан ветераннарга тагын бер тапкыр илебез азатлыгы, бәхетле тормыш өчен ихлас хөрмәтебезне белдерәсе килә, — ди «Җиңү иреклеләре» Бөтенрусия иҗтимагый хәрәкәтенең Башкортстан буенча җитәкчесе Александр Юдин. — Киләчәктә дә бу юнәлештәге эшчәнлекне дәвам итәчәкбез. Мондый очрашуларны 9 май уңаеннан гына түгел, даими рәвештә үткәрү зарур».
«Чишмә» халык иҗаты йортында үткән чара да яшь буынга Бөек Җиңүнең нинди бәя белән яуланганын, тыныч тормышта яшәүнең зур бәхет булуын күрсәтү максатын күзаллады. Ватанпәрвәрлек рухтагы проектның төп каһарманнары — сугыш еллары афәтен үз йөрәкләре аша кичергән, аның бар михнәт-газапларын күргән кешеләр, сугыш чоры балалары.
... Ветераннар белән очрашу «Өч тонна» иҗади остаханәсендә шөгыльләнүче егетләр-кызлар әзерлегендәге «Онытмыйбыз, горурланабыз!» дип исемләнгән театральләштерелгән тамашадан (сценарий авторы — шагыйрь, журналист В. Әбдрәзаков) башланып китте. Сәхнәдә бер-бер артлы кино кадрларындагы сыман тормыштан өзекләр чагылып үтте.
Тамашачыларның күзендә яшь тамчылары ялтырый, кайберәүләр күңелендә яңарган яшьлек хатирәләреннән авыр сулап, сыктап куя. Шигъри-җырлы композиция аша артистлар кешеләрне тынычлыкка, дус-тату яшәүгә өнди. «Кабатланмасын сугыш афәте, Җир-Анага кайгы-хәсрәтләр башкача килмәсен».
Тамаша ахырында ветераннарга «Пакер» фирмасы әзерләгән бүләкләр таратылды. Соңыннан алар «Вертикаль» җәмгыяте булышлыгында оештырылган чәй табынына чакырылды.