Барлык яңалыклар
10
Безнең шәһәрдә
12 март , 15:07

Милли киемнәрдә — күңел байлыгы

Алинә Имаева үзенең карт әбисенең нәрсә киеп йөргәнен яхшы белә

Милли киемнәрдә — күңел байлыгы
Милли киемнәрдә — күңел байлыгы

Татар милли киемнәре элементларын киеп алган Алинә Имаевадан күзләреңне ала алмыйсың!
Бу киемне Алинә Фәнис кызы үзе уйлап тапкан.­ Нә­фис күлмәк, татар күк­рәкчәсе, баш киеме... Алар барысы бергә тулы бер сок­лану уята.
Этник мотивлар белән ул бер ел элек кенә шөгыльләнә башлаган. Моңа массакүләм шәһәр чараларында катнашу этәргеч булган. Аларда милли киемле кунаклар үзгә матур күренә. Алинә ханым нигә әле үземә шундый нәрсә эшләп карамаска дигән уйга килгән. Һәм ул уйлап кына калмаган!

Эшне хатын‑кыз баш кие­ме ясаудан башлаган. Беренче калфакны бәрхеттән ясаган, аны тасма белән бизәгән.
— Чигәргә дә була, әмма ул үзенә күбрәк вакыт таләп итә, — диде оста.
Аннары күкрәкчәгә күч­кән. Киемнең бу детале күлмәк кисемен каплый һәм бер үк вакытта бозымнан һәм күз тиюдән саклый. Түшлек тәңкәләр, тасмалар белән бизәлгән, кырыйлары — бөрмәле.
— Кыз никадәр бай булса, аның күкрәкчәсе шуның кадәр күбрәк алтын белән бизәлә. Ярлырак халык аны тукыма кисәкләре белән бизәгән, — дип сөйли Али­нә Фәнис кызы. — Калфак теләсә нинди күлмәк, костюм белән яраша. Аны теләсә кая кияргә мөмкин.

Образны шулай ук үзе теккән күлмәк тулыландыра. Гәрчә ул тегүче дә, кием кисүче дә түгел. Ләкин барысы да уңышлы килеп чыккан.
Оста сүзләренчә, ул популярлаша барган этномода белән кызыксына, кешеләр кием аша үзләренең милләтләрен күрсәтергә омтыла.
Этно киемгә ихтыяҗ бар. Ул мәдәни чараларда, очрашуларда, тантаналарда урынлы күренә, дип саный Алинә Имаева. Дөрес, аны җитештерү җиңел түгел. Документаль чыганакларны өйрәнергә кирәк, чөнки костюм тарихы — тулы бер фән, һәм оста әкренләп аңа якынлаша.

— Безнең карт әбилә­ребезнең нәрсә кигәннәрен белергә кирәк. Кешеләрнең үз мәдәнияте, үз чыганагы, шул исәптән милли киемнәре белән кызыксына башлавы сөендерә, — дип сөйли Алинә Имаева.
Останың иҗатында башкорт костюмындагы сувенир курчаклар да аерым урын алып тора. Менә чибәр Әминә — «грунтланган текстиль» техникасында эшләнгән курчак. Аның киеме сәйлән, алтын тасма, пайеткалар белән бизәлгән. Йөзе акрил буяулар белән буялган. Сәйлән алкалар. Күкрәкчә. Табигый мехтан шапка. Толымнары йоннан, аларга тимер акчалар үрелгән. Кечкенә һәм матур курчак.

Оста куллы Алинә Имаева җитештерүдә эшләгән елларда да иҗади хезмәткә вакыт таба торган булган. Хәзер ул лаеклы ялда, яраткан эшенә ике куллап тотынган.
— Тегесен дә, монысын да эшләп карыйсы килә. Кешеләргә шатлык китерергә яратам!
Ә соңгы вакытта мавыккан этник мотивлар аның иҗатына аеруча күркәмлек өсти.

 

Резеда НУРТДИНОВА

Автор:Аида Ханнанова
Читайте нас: