Ә бездә бүген Кар Көне!

Әлеге чара гадәттәгечә гыйнвар көннәренең берсендә яшь буынны физик культура һәм спорт белән шөгыльләнүгә җәлеп итү максатында үткәрелә һәм сәламәт яшәү рәвешен пропагандалауга хезмәт итә. Билгеле булганча, физик яктан сәламәт һәм рухи яктан бай милләт - бөтен ил иминлегенең, киләчәккә ышанычның, спортта һәм башка бик күп җиңүләрнең нигезе.

Кышкы спорт бәйрәмендә катнашучыларны хакимият башлыгы урынбасары Октябрь Латыйпов, спорт һәм физик культура комитеты рәисе Илдар Карипов, мәгариф бүлеге җитәкчесе Роберт Хәйдаров, «Спартак» спорт-сәламәтләндерү комплексы директоры Валериан Лукьянов сәламләде. 3нче санлы спорт мәктәбе тәрбияләнүчесе, Русиянең спорт мастеры, СВОда катнашучы, «Батырлык өчен» медале белән бүләкләнүче Иван Куликов чараның мактаулы кунагы булды.

Оештыручылар күп төрле кышкы уеннар әзерләделәр. Балалар һәм өлкәннәр гаилә эстафетасында ярыштылар, карда футбол уйнадылар, чаңгы ярышларында катнаштылар, киез итек ыргытуда төгәллекне тикшерделәр, аркан тартуда команда рухын күрсәттеләр. «Киез итек киеп йөгерү» конкурсы аеруча зур кызыксыну  уятты.

Кар көне азагында җиңүчеләрне һәм призерларны бүләкләделәр.

Карда футбол буенча ярышларда 2нче гимназия командасы җиңү яулады, икенче урында - 3нче гимназия, өченче урында - 20нче һәм 22нче мәктәпләр командалары.

6-7 сыйныф кызлары арасында чаңгы ярышлары буенча беренче урында Ксения Твердохлеб, икенче урында — Арина Нияскулова, өченче урында — Юлиана Быстрова.

Малайлар арасында Никита Исаев җиңүче булды, көмеш - Андрей Тимофеевта, бронза - Кирилл Бикбулатовта.

Гаилә эстафетасында беренче урынны Сәмигуллиннар гаиләсе (3нче гимназия) алды. Маннановлар (17 нче мәктәп) - икенче, ә Мөхәммәдиевлар (18 нче мәктәп) өченче урында. Барлык катнашучыларга һәм ярышларны оештыручыларга рәхмәт! Кар көне һәркемгә уңай эмоцияләр, яңа танышулар һәм физик культура белән шөгыльләнү өчен илһам бүләк итте!

Ә 8 февральдә Октябрьскийда яшәүчеләрне һәм кунакларны «Спартак» чаңгы базасында «Русия чаңгы юлы-2025» Бөтенрусия массакүләм чаңгы ярышлары кысаларында узачак чаңгы ярышларына көтәбез.