Башкорт аты фестивале уза торган махсус кырда "Ылак" финал уены һәм ат чабышлары башланды

Казахстан командасы бик көчле булып чыкты һәм баймаклыларга беренче өлештә җиңел булмады. Уенның икенче өлеше дә бик кызык булды. Бер үк вакытта ат чабышлары башланды, анда Башкортстаннан гына түгел, Русиянең төрле төбәкләреннән килгән спортчылар да катнаша. Барлыгы алты чабыш булачак. Беренчесендә ике яшькә кадәрге башкорт токымлы атлар чабачак, икенчесендә – өч яшькә кадәрге башкорт атлары. Өченче йөгерешкә чиста токымлы атлар чыга. Дүртенчедә – дүрт яшькә кадәрге башкорт атлары. Бишенче узышта башкорт атлары җиде чакрым дистанциядә көч сынашачак. Алтынчы чабышта барлык токымдагы атлар сигез түгәрәк йөгерәчәк. Ат чабышлары Баймак районында бик популяр. Бүген Графское күле янында уза торган ат чабышларын карарга да күп сандагы баймаклы җыелды. Җанатарлар тавышы астында узган беренче ярышта Миранда кушаматы җирән атта Борис Турсунбаев җиңү яулады. 24 спортчы катнашкан икенче йөгереш тә бик мавыктыргыч үтте. Алар арасында Илнур Кадыргулов финиш сызыгына беренче булып килде.

Автор: Илмира ГАЛИЕВА