Яңа йолдызлар кабынды

Яшьләр сараенда Театр елы һәм Башкортстанның 100-еллыгына багышланган «Яшь талантлар-2019» фестиваль-конкурсы үтте.
Быелгы конкурста мәктәп укучылары, студентлар, яшьләр җәмәгать берләшмәләре вәкилләре — барлыгы 70тән артык катнашучы төрле жанрлар һәм номинацияләрдә үз осталыкларын күрсәтте.
Жюри һөнәриләрне һәм һәвәскәрләрне аерым бәһалады. Шулай булса да, иң яхшыларны сайлап алу шактый авыр булды. Яшьләрнең яхшы әзерлеге әллә каян күренеп торды. Чөнки һәр номер башкару осталыгы, артистлык ягыннан да аерылып торды.
Бәйгенең гала-концертында иң чагу чыгышлар тәкъдим ителде. Ул бал-маскарад рәвешендә оештырылды. Алып баручылар анда катнашучыларның сер-сәләтләрен ачты. Талантлы яшьләр бәйрәме вальс биюе белән башланып китте. Яшь җырчылар, биючеләр бер-берсен алыштырып торды. Тамашачылар һәр чыгышны җылы кабул итеп, озайлы алкышларга күмде. «Импульс» ансамбленең «Халыклар дуслыгы» биюе истәлекле бәйрәм алдыннан узган чарага тагын да зуррак әһәмият өстәде. Концерт номерлары җиңүчеләрне билгеләү тантанасы белән үрелеп барды. «Хореография» номинациясендә Арина Федосеева (соло), Денис Даутов һәм Арина Федосеева (дуэт), «Импульс» бию коллективы (ансамбль) беренче дәрәҗә лауреат булды. «Нәфис сүз» төркемендә Фирдус Гәрәев, Анастасия Сидорова (монолог), «Нефть» театр студиясе (театраль куелыш) беренче дәрәҗә лауреат исемен алды. «Вокал» номинациясендә Валерия Шәймәрданова, Геворг Кочарян, Соня Есипова, Илназ Вилданов (соло), Даниэль Вәлиев һәм Карина Саргсян (дуэт), «Задумка» (ансамбль) югары бүләкләргә лаек булды.