Изге эшнең иртә-киче юк

Узган ялларда «Нефтьче» паркы чын мәгънәсендә сабантуй мәйданына әверелде.
Бу биредә мөселман кардәшләрнең иң олуг бәйрәме — Корбан гаетенә багышланган матур чаралар оештырылуга бәйле иде. Корбан бәйрәме 11 августта ук үтте ич, диярсез, дуслар. Әмма изге эшнең иртә-киче юк диләрме әле? Паркта бәйрәм оештыручылар да шушы гыйбарәне күзаллап эш иткәндер
дип уйлыйм. Мондый игелекле башлангычларга куанасы һәм аларны гамәлгә ашыручыларга «Афәрин!» диясе генә кала...
Агымдагы елда «Нефтьче» паркында үткәрелгән бәйрәм дә бик матур, күңелле үтте. Күрер күзгә 2-3 меңгә якын кешене җыйды ул. Нинди генә уен-бәйгеләр оештырылмады бу көнне, барысында катнашып кына өлгер! Малайлар-кызлар рәхәтләнеп күңел ачты, кечерәкләр сурәт төшерү, кул эшләнмәләре ясау, аркан тартышу, капчык киеп йөгерүдә көч сынаса, олыраклар милли көрәш, гер күтәрү, армрестлинг ише «җитдирәк» бәйгеләрне сайлады. Уеннар арасында ял итеп, тамак ялгап алырга теләүчеләр өчен күп сандагы сәүдә нокталары оештырылган иде. Анда төрледән-төрле камыр ризыклары, хәләл нигъмәтләр, туңдырма, татлы «мамык» сатып алу мөмкин булды. Шулай ук һәркем арзан гына бәядән кайнар пылау, шашлыктан авыз итә алды.
Динебез белән кызыксынган, бу өлкәдә азмы-күпме гыйлеме булганнар өчен махсус биремнәр әзерләнгән иде. Аларның барысын да уңышлы башкаручылар иң ахырдан бүләккә лаек булды. Бу бәйге вакытында мәдрәсә-мәчетләребездә укытучы туташ-ханымнар балаларның Ислам тарихы һәм аның төп кануннары, дини гореф-гадәтләр буенча белемен тикшереп кенә калмады, ә мөселман дөньясына кагылышлы фәһемле мәгълүмат та бирде. Мисалга, Сафа һәм Марва арасында «йөгерү» йоласы турындагы бәянне генә алыйк. Ибраһим галәйһиссәләм Аллаһ Тәгалә әмере белән җәмәгате Һаҗәрне улы белән Мәккә янына илтеп калдыра. Һаҗәр анабыз су эзләп Сафа һәм Мәрвә таулары арасын 7 тапкыр урап йөгерә, әмма бер тамчы су табалмый. Нәни улы Исмәгыйль яткан җиргә әйләнеп кайтуга, ул чын могҗизага тап була: биредә Зәм-зәм суы бәреп чыга. Су эзләп тукталган мосафирлар да бу җирдә яшәп калалар. Әлеге риваять Аллаһының кодрәте вә чиксез мәрхәмәте хакында тагын бер кат искәртә сыман...
Бәйрәм кызыклы да, файдалы да уеннар, сәхнәдән намаз укулар, фикер алышулар белән дәвам итте. Бер арада чарада катнашучы балалар, олылар белән әңгәмәләшеп алдык.