Башларга гына кирәк, дәвам итүчеләр табыла икән

Чынында исә шулай икән бит! 28 ел дәвамында «Туган як» гәзите урнашкан Ленин проспектындагы эш урыныбыздан Чапаев урамына күченгәнгә быел сентябрьдә бер ел тула.
Сезгә ничектер, кадерле укучыларыбыз, без инде яңа урынга ияләштек, җайлаштык. Әмма редакциягә кунакка килүчеләр сизелерлек кимеде. Әллә һаман бу хакта белмәүчеләр бар, әллә тапмый интегәләр, билгесез. Менә шул элекке эш урыныбыздагы ишегалдында безнең үз кулларыбыз белән эшләнгән чәчәклек бар иде. Бер көнне шуны карап кайтырга булдык. Ни гаҗәп, ул игътибарсыз калмаган, шау-гөр чәчәк атып утыра. «Димәк, кемнәрдер тәрбиягә алган», — дип сөенеп куйдык.
Ихатадагы матурлык-пөхтәлек әллә кайдагы дәдәйгә түгел, ә шунда яшәүчеләрнең үзләренә кирәк, мөгаен, шул күзлектән чыгып, йортта яшәүчеләр безнең чәчәклекне үз карамагына алгандыр. Бу бик куанычлы. Арытаба да чәчәкләрнең хәлен белеп торырбыз, дип аларга кул болгап саубуллаштык.
Гәзитебез үзенең 30 еллыгын билгеләргә җыена. Шуңа бәйле киләсе ел чагу бәйрәмнәргә, истәлекле очрашуларга, матур кичәләргә, бәйгеләргә бай булачак. Бу чаралардан сез дә читтә калмаячаксыз. Ә аларда катнашу, хәбәрдар булу өчен гәзиткә язылырга кирәк.