Ураза — балаларны иманга өндәү чарасы

«Нефтьче» паркында узган бәйрәмнең рәсми өлешен Зает мәчете имам-мөхтәсибе Рөстәм хәзрәт Шакировның чыгышы ачып җибәрде. Ул барча халыкны Ураза Гаете белән тәбрикләде.
«Бүгенгедәй чара шәһәребездә тәүге тапкыр үткәрелә, — диде Рөстәм хәзрәт. — Аның максаты — шәһәрдәшләрне һәм кунакларны динебез, мөселман дөньясы белән таныштыру. Ислам ул — хак, дөрес һәм тынычлыкка чакыра торган дин. Изге Рамазан ае да тәмамланды. Аллаһы тоткан уразаларыбызны кабул итеп, һәрберебезгә саулык-сәламәтлек, иман ныклыгы, күңел тынычлыгы, бәрәкәтле тормыш, иминлек-тынычлык бирсен».
Арытаба бәйрәмне алып баручы килгән кунаклар арасында сораштыру үткәрде. «Рамазан ае башкалардан нәрсәсе белән аерыла?» дигән сорауга балалар да, өлкәннәр дә кемузардан җаваплар «яудырырга» тотынды. «Рамазан аенда изге Коръән иңдерелгән, бу чорда мөселманнар ураза тота, игелекле гамәлләр кыла, хәер-сәдака бирә, дога укый, начарлыктан тыела, мәчеткә йөри, рухи һәм физик яктан чистарына, кунакка йөрешә, туганлык җепләрен ныгыта, ифтар мәҗлесе үткәрә һ. б.». Шул рәвешле шәһәрдәшләр Ислам дине белән ихлас кызыксынуын, аның төп тәгълиматларын яхшы белүен күрсәтте. Ә инде бәйрәм чаралары барышында бу белемне тагын да арттырырга мөмкин булды.
Яшь шәһәрдәшләр һәм кунаклар аркан тарту, капчык киеп йөгерү, күз бәйләп уенчыкны табу, аякка бәйләнгән шарны шартлату ише күмәк уеннарда катнашты, викторина сорауларына, табышмакларга җавап бирде. Малайлар-кызлар Коръән сүрәләрен яттан уку, гарәп әлифбасын, Ислам нигезләрен белү буенча да белемнәрен тикшерде. Бу көнне шулай ук рәт-рәт тезелеп киткән сәүдә нокталарында камыр ризыклары, хуш исле пылау, шашлык һәм башкаларны арзан бәядән сатып алырга мөмкин булды.
Форсаттан файдаланып, бәйгеләрдә катнашучы балалар белән сөйләшеп алдык.