Туган як
+24 °С
Ачык
Барлык яңалыклар
Безнең шәһәрдә
11 апрель 2019, 13:09

Санлы телевидениегә күчәбез

Билгеле булуынча, 3 июньнән республикада аналог ТВ тапшырулары тулысынча туктатылачак.

Билгеле булуынча, 3 июньнән республикада аналог ТВ тапшырулары тулысынча туктатылачак.
Телеэкраннарда санлы телевидениене кабул итүгә күчү зарурлыгы турында хәбәр урнаштырылачак. Ул бер атна дәвамында экранда торачак. Шушы көннән телевизорны яңа төрдә карауга тоташтырырга яисә махсус приставка куярга кирәк булачак.
Федераль телеканаллар тулысынча санлы эфир челтәрендә генә күрсәтәчәк. Ягъни, «Россия» яисә «НТВ» телеканалы урынына «сез аналог телевидение карыйсыз, санлыга тоташу кирәк», дигән язу белән кара экран гына булачак.
Республика халкы бүгеннән үк 20 төп федераль телеканалны бушлай һәм югары сыйфатта карый ала. Моның өчен санлы форматка күчәргә кирәк. Санлы эфирлы телевидениегә күчүне нәрсәдән башларга? Башта өегездәге телевизорны тикшерегез: ул DVB-T2 санлы сигналны кабул итәргә сәләтлеме? Заманча яссы телевизорлар (2013 елдан соң чыккан) моңа сәләтле. Аларның хуҗаларына дециметр диапазонлы антенна сатып алу да җитә. Ә инде иске телевизордан (2013 елга кадәр) кулланучыларга антенналы санлы приставка алырга кирәк булачак. Безнең шәһәрдә аның хаклары 899-2490 сум. Приставкаларны көнкүреш товарлары кибетләрендә һәм почта бүлекчәләрендә сатып алырга мөмкин.
Бу эшләрне башкаргач, беренче очракта заманча телевизорны антеннага тоташтырырга һәм пульттагы автоматик көйләү төймәсенә басарга кирәк. Санлы каналларны электроника үзе табачак. Телевизор иске булган очракта башта аны приставкага ялгарга кирәк. Арытаба андагы «автоматик эзләү» төймәсенә басып, телевизорны AV режимына күчерергә кирәк (бу төймә ТВ пультында бар). Шуннан соң сез санлы телевидение карый алачаксыз. Әгәр сез әле телевизор экраннарыгызда «Беренче канал», «Россия 1», НТВ, 5 Канал, Рен-ТВ һәм СТС логотибы белән янәшә «А» хәрефен күрәсез икән, димәк, сез аналог телевидение карыйсыз.
Кабельле яисә IP телевидение һәм юлдаш тәлинкәсеннән файдаланучыларга антенна һәм приставка таләп ителмәячәк. Аларның операторлары үзаллы «сан»га күчәчәк. Үзгәрешләр бүлмә һәм тышкы антенна белән кулланучыларга кагыла.
Санлы приставка белән кулланучылар төбәк БСТ каналсыз калмаячак. Антенналы приставканы тоташтырганда элеккеге метр диапазонында кабул итүче антеннаны калдырып, антенна аергычны (разветвитель) хәстәрләргә генә кирәк булачак. Ул чакта федераль каналлар приставка аша күрсәтеләчәк, БСТ — турыга антеннадан. Юлдаш телевидениесен тоташтырганда пакетында БСТ булганын сайлагыз.
Санлы телевидениенең өстенлекләре бик күп. Ул зәңгәр экран хуҗаларына 20 дәүләт телеканалын абонент түләүсез һәм иң яхшы HD, 4K сыйфатында карарга мөмкинлек бирә. Кабельле, интернет, юлдаш тәлинкәсе аша тапшырулар, үзегез беләсез, түләүле. Ә монда бер приставка яисә антенна алып кына куясы! Шулай ук аңа табигать шартлары тәэсир итми; сурәт-тавышларның сыйфаты бик югары; телетекст, тапшырулар программасы кебек төрле хезмәтләрдән файдаланырга мөмкин.
Шәһәрдә санлы телеэфирга күчү мәсьәләсе буенча хакимият башлыгы урынбасары Б. И. Алчиновка мөрәҗәгать иттек.


— Борис Иванович, Октябрьскийда ничә хуҗалык телесигналны тышкы яки бүлмә антеннасы аша кабул итә?
— Шәһәрдә 48108 мондый йорт исәпләнә.

— Халыктан санлы телевидениегә күчүгә кагылышлы сораулар киләме?
— Әйе, мөрәҗәгатьләр кабул итәбез, барысына да тулы аңлатмалар бирелә.

— Шәһәрдәшләр арасында аңлату эшләре алып барыламы?
— Әлбәттә, бу юнәлештә урындагы радио, телевидение, матбугат басмалары, социаль челтәрләр аша даими эшлибез. Моннан тыш, төбөк җәмәгатьчелек советлары рәисләре махсус белешмәлекләр тарата.

— Аңлату эшенә ирекмәннәр жәлеп ителәме?
— Әйе, бу эштә бүгенге көндә 96 кеше мәшгуль.

— Пенсиягә федераль социаль өстәмә түләүләр алучылар һәм балага айлык пособие алучы аз керемле гаиләләргә ярдәм күрсәтеләме?
— Әлеге вакытта күпгамәлле үзәккә ике кешедән ташлама алу буенча мөрәҗәгать килде.
Искәрмә: Хөрмәтле гәзит укучылар! Санлы телевидениегә күчү буенча сорауларны «Русия телевидение һәм радиотапшырулар челтәре»нең тәүлек әйләнәсенә эшләүче федераль кайнар элемтә телефоны аша бирергә мөмкин: 8-800-220-20-02.

Халык фикере
Санлы телевидениегә кагылышлы үзгәрешләргә октябрьскийлылар ничек карый икән? Шәһәрдәшләрнең фикерен ачыклау өчен сораштыру үткәрдек.

Марат, 46 яшь:
— Мин телевизорны «тәлинкә», ягъни спутник телевидениесе ярдәмендә карыйм. Анда каналлар бик күп. Телевидение аша ил һәм дөнья хәбәрләре белән танышам, фильмнар карыйм. Аеруча республика программалары, ә федераль каналлардан «Россия 24», «Звезда» ошый.
Безнең төбәктә яшәүчеләрне санлы телевидение белән иреклеләр таныштырып йөрде. Мин бу яңарышка уңай карыйм. Әмма спутникны да калдырачакмын, чөнки каналлары күбрәк.

Сабира апа:
— Иске генә телевизорым бүлмә антеннасына көйләнгән. Бу бик уңайсыз, каналлар әз, сурәте сыйфатсыз. Санлы технологиягә күчү турында «Туган як» гәзитеннән укып белдем. Шунда ук бу хәбәр кызыксыну тудырды. Әмма уйга калдым: бу эшне үзаллы гына башкарып чыгалмаячакмын бит. Аяклар авырта, еракка чыгып йөри алмыйм. Ярар, туганнар ярдәмнән ташламады. Кирәкле җайланмаларны сатып алып, урнаштырып та бирделәр, рәхмәт төшкере.

Хәмдия әби:
— Гәзиттә 3 июньнән санлы телевидениегә күчәбез, дип язганнар. Мин телеканалларны өй антеннасыннан гына карыйм. «Тәлинкә»лесе юк. Сыйфат турында әйтеп торасы да түгел, бик начар күрсәтә. Шулай булса да ярап тора иде әле, чөнки яңа антенна, санлы кушымталар алырга акчам юк. Ә хәзер, аналоглы каналлар бетерелгәч, мин телевизор караудан бөтенләй мәхрүм калырмын микәнни?

Гөлшат, 33 яшь:
— Ике ел элек яңа йортка күчендек. Кызганычка каршы, кабель телевидениесен ул урамда кертү мөмкинлеге булмады. «Тәлинкә»гә тоташу теләге дә юк иде, чөнки хакы «тешләшә». Булган каналларга риза булырга туры килде. Калганнарын интернетта карадык. Телевизорыбыз яңа, шуңа күрә санлы телевидениегә күчү турында белгәч тә каналларны автоматик рәвештә көйләдек. Хәзер иркенләп өстәмә 20 канал карый алачакбыз. Моңа бик шатбыз!



Читайте нас: