Хатын-кызлар өчен яңа клуб оештырылды

Шәһәребезнең гүзәл затларына күңелле хәбәр җиткерәбез: Октябрьскийда татар хатын-кызлары өчен «Сәлам» исемле клуб ачылды.
Шушы көннәрдә аның чираттагы җыелышы үтте. Чарага шәһәр хатын-кызлар советы җитәкчесе Асия Мофаззалова, ак әбиләр Рәзинә Сабирова, Миңниса Латыйпова чакырылган иде.
Асия Габбас кызы җыелучыларны хатын-кызлар советы эшчәнлеге белән таныштырды, яңа клубның юнәлешләрен төрләндерү буенча киңәшләрен бирде. Шәһәрдәге башка клуб, берләшмәләрнең дә эш тәҗрибәсен өйрәнеп, алар белән хезмәттәшлек итәргә чакырды. Мәсәлән, «Сәлам» клубы әгъзалары, китапханә карамагындагы әдәби берләшмә татар поэзиясе бүлеге оештырып, үзләре язган әсәрләре белән чыгыш ясарга, шигырь укучылар бәйгесе үткәрергә мөмкин, диде ул.
Клубның әлеге җыелышы татар хатын-кызларның баш киемнәренә багышланды. Матур чигүле калфаклар, күз явын алырдай бизәкле яулыклар, шәлләр күргәзмәсе тәкъдим ителде. Кадерләп сакланган милли киемнәрнең байтагын Рәзинә Сабирова алып килгән иде. Рәзинә Яхъя кызының шәхси коллекциясендә булган әйберләрнең тарихы да бай. «Менә бу каюлы читеккә 200 еллап. Аны Казанда теккәннәр. Хуҗасы шушы читекне киеп намаз укыган булган. Ул аны кызы Разыяга калдырган. Разыя апа минем әнкәйгә шушы читекне бүләк итеп бирде. Әнием дә аны киеп намаз укыды. Аңардан ул мирас миңа калды. Чулпылар исә карт әниемнеке, XIX гасырның башында, урталарында эшләнгән», — дип сөйләде ул. Аның үз китаплары күргәзмәсе дә игътибарсыз калмады.
Җыелучылар матур итеп яулык бәйләргә дә өйрәнде. Осталык дәресен клубны оештыручы Гөлсем Мансурова үткәрде.
Бу көнне клубка килүчеләр бик күп файдалы мәгълүматлар туплады. Һәркайсы рәхмәтле булып, киләсе очрашуны көтеп калуын белдерде. Җанлы аралашу чәй табыны артында дәвам итте.
Кунаклар таралганнан соң клуб җитәкчесе белән әңгәмәләшеп алдык.