Италия кунаклары

Моңа кадәр бездә кунакларның ниндие генә булмады дисәм дә, Италиядән булганнары юк иде әле. Гади кунак өчен аш-су әзерләүгә осталык, ихласлык кирәк булса, чит ил кешесе белән аралашу, күңел ачу тагын да бер зирәклек таләп итә. Шундый зур кунакларны кабул иттек күптән түгел без.

Моңа кадәр бездә кунакларның ниндие генә булмады дисәм дә, Италиядән булганнары юк иде әле. Гади кунак өчен аш-су әзерләүгә осталык, ихласлык кирәк булса, чит ил кешесе белән аралашу, күңел ачу тагын да бер зирәклек таләп итә. Шундый зур кунакларны кабул иттек күптән түгел без.
Туймазыда яшәүче туганнарыбыз Лиана белән Марат Шәвәлиевларда менә ярты ел инде Элиза Джованетти яши. Ул Италиянең Рокка ди Папа шәһәреннән «AFS» программасы кысаларында халыкара укучылар алмашу буенча бер елга килгән. Августтан бирле Шәвәлиевларда яшәүче Италия кызы гаиләдә үз кешегә әверелгән. Рәхәтләнеп безнең телдә аралаша, пилмән, бәлеш пешерергә өйрәнгән, үз ризыклары белән дә сыйлый, чаңгы-тимераякта да шуа хәзер. Шуны да билгеләп үтәргә кирәк, бу программа нигезендә укучы бала алган гаиләгә бер тиен дә түләнми, ашату, каядыр алып бару чыгымнары — барысы да кабул итүче гаиләнең исәбеннән. Гади мәктәптә — Туймазының 8нче мәктәбендә бушлай укый, спорт түгәрәкләренә йөри. Немец, испан, урыс телләрен тирәнтен өйрәнә. Каникуллар чорында Казанга, Санкт-Петербургка алып барганнар үзен. Безнең йола-гадәтләргә башта кыз бераз сәерсенеп торса да, хәзер инде кайнар мунчадан соң «икенче әти-әнисе» Марат белән Лиана үрнәгендә карга да, бәкегә дә чума. Элиза бу күренешләрне телефонына төшереп, әти-әнисенә җибәрә. Алар үз чиратында таң кала, әби-бабалары исә бөтенләй: «Үз акылыңдамы син?» дип язып җибәрә. Моннан соң күп тә үтми, Элизаның әти-әнисе Русиягә, кызларының хәлен белергә дип юлга чыга. Һәм менә алар Башкортстанда! Кунак булуның икенче көнендә аларны авыл тормышы белән таныштыру өчен Илчембәткә алып килделәр.
Көн дә Италия кешеләре белән очрашып тормыйбыз әле дип, форсат тигәндә, кунаклар белән иркенләп аралаштык. Һәр нәрсәгә зур кызыксыну белән карыйлар: моны кем эшләде, бу нәрсә өчен... Элиза безнең тәрҗемәче булды. Марио әфәнде белән Чилция ханым бик тыйнак, җитди кешеләр булып чыкты. Һәр сорауга җавап биргәнче яхшылап уйлыйлар, аннары бер-берсе белән киңәшләшеп алалар. Марио — электрчы, Чилция страховка агенты булып эшли.

— Монда килгәнче, Сез Русия турында нәрсәләр белә идегез? Кызыгызны ничек безнең илгә җибәрергә җөрьәт иттегез?
— Әлбәттә, бик курыктык. 16 яшьлек кызыбызны җиде ят җиргә җибәрү карарына килү җиңел булмады, аның телләр өйрәнүгә булган омтылышы көчле иде, шуңа да безне ниһаять күндерде. Русия — бик зур ил, анда нык суык, халкы эчә, күбесе эшсез, кешеләре усал, һич тә елмаю белми икән, дигән мәгълүматка ия идек. Шуңа да курку, шикләнү хисе тойдык. Әмма монда килгәч, боларның дөреслеккә тап килмәвен күрдек. Шәвәлиевларның һәм башка русиялеләрнең аэропорттан ук каршы алып, безне күптәнге якыннары итеп күрүләренә, төрле чараларга, күренекле урыннарга алып баруларына, кызыбызга булган җылы мөнәсәбәтләренә шаккаттык.

— Сезне Русиядә иң нык гаҗәпләндергәне?
— Иң элек — кар! Ул шулкадәр күп, андыйны күргәнебез юк иде әле. Бездә, Италиянең Рокка ди Папа шәһәрендә, кар елына нибары 1-2 тапкыр яуса ява, һәм ул көн бездә гадәттән тыш хәлгә тиң була, чөнки юллардан автотранспорт йөри алмый, мәктәпләр ябыла... Ә сездә машиналар да иркенләп йөри, балалар да чаңгы-тимераякта шуарга ашыга. Монысы бер. Аннары халкыгыз шундый ихлас, киң күңелле. Аш-суны да мул әзерлисез, милли ашларыгыз туклыклы һәм күп төрле. Мәктәптәге укытучыларның җаваплылыгы да гаҗәпләндерде, бездә исә укучы мәктәпкә килмәгән очракта да, аның килмәү сәбәбе белән кызыксынучы юк. Һәркем үзе өчен: тели икән бара, укый, тырыша... Ә монда кулына кияргә бияләе бармы-юкмы шуны да хәстәрлиләр.

— Элиза ярты ел сездән башка чит илдә яши. Шушы чорда аңарда ниндидер үзгәрешләр сизеләме: холкында, төс-кыяфәтендә...
— Иң элек күзгә ташланганы — авырлыгы арткан (көләләр — автордан). Аннан ул бик канәгать, йөзендә үк чагыла, аңа яхшы булгач безнең күңел дә тыныч. Бик күркәм гаиләгә тап булган, аларга чиксез рәхмәтлебез, хәзер инде Элиза кызыбыз ике әниле, ике әтиле. (Марат белән Лиананы да Элиза әти-әни дип йөртә — автордан). Кызыбызга карыйбыз да гаҗәпләнәбез, ул безне әлләни сагынмый да кебек, көне буе нәрсә белән булса да мәшгуль, түгәрәкләр, мәдәни чаралар, олимпиадалар... Сагынырга вакыты юк, ахрысы!

— Чилция, Марио, әгәр кызыгыз киләчәктә Русия кешесе белән гаилә корырга һәм биредә калырга теләсә, сез моңа ничек карар идегез?
— Әгәр ул безнең кызыбызны хөрмәт итсә, яратса, без каршы булмаячакбыз. Элиза акыллы кыз, без аңа ышанабыз. Киләчәктә югары белемле табиб-хирург булырга, Русиядә яисә АКШта укырга хыяллана. Хыяллары тормышка ашуын телибез, хәзер гаиләбез ишәйде, Шәвәлиевлар якын туганнарыбыз кебек безгә. Сезнең барыгызга да ишекләребез ачык, рәхим итегез! — дип хушлашты Джованетти гаиләсе.
Күчтәнәч итеп алар үз илләренә самавыр, милли бизәкле сувенирлар, казылык, чәк-чәк алып кайтып китте. Хәерле юл сезгә!
Әйе, мактанып түгел, кунакчыл халкыбызның сый әзерләве, сыйлау тәртибе, кагыйдәләре Европа илләренекеннән калышмый, димәк. Барыбызга да кунак килгәндә пешереп куя торган татар халык ашлары бар: токмачлы аш, бәлеш, чәк-чәк, өчпочмак, кыстыбый, тәбикмәк... Италия кунаклары боларның барысыннан да авыз итте, һәм өйләренә кайткач һичшиксез диетага утырачакларын әйтте. Илебез, халкыбыз турында яхшы фикерләр туплап кайтып китте кунаклар, без моңа чиксез шатбыз. Дуслар елмаеп караса, дөньялар яктырып киткән кебек була бит! Чынында исә шулай.

Юлия ДӘҮЛӘТБАЕВА.

Читайте нас:

Регистрационный номер ПИ № ТУ 02-01360 от 23 июля 2015 г.

Телефон

8(34767) 6-03-28

Электрон почта

[email protected]

Адресы

452614, г. Октябрьский, ул. Чапаева, 18; 2 этаж, 7, 8, 9 каб

Реклама хезмәте

8(34767) 6-12-51

Редакция

8(34767) 6-03-00, 8(34767) 6-03-28, 8(34767) 6-12-51

Кабул итү бүлмәсе

8(34767) 6-03-28

Хезмәттәшлек

8(34767) 6-03-00, 8(34767) 6-03-28, 8(34767) 6-12-51

Кадрлар бүлеге

8(34767) 6-12-51, 8(34767) 6-75-35