Һәркем дә сварщик булалмый!

Хөкүмәтебез тарафыннан расланган икътисад үсеше өчен иң кирәкле һөнәрләр исемлегендә «сварщик» та бар.
Бүгенге көндә нәкъ эшче һөнәрләргә ия булучылар илебез икътисады нигезе булып тора. Механик, слесарь, газ һәм электр белән эретеп ябыштыручы, төзүче ише белгечлекләргә ихтыяҗ зур булса да яшьләр бу юнәлеш буенча укырга ашкынып тормый. Аларны күпчелектә тузанлы-пычрак эш, җиңел булмаган шартлар һәм җаваплылык та куркытадыр. Шуңа күрә дә эшче һөнәрләргә кызыксыну уяту өчен мөмкин булганның барысы да эшләнә. Бу — югары хезмәт хакында да, социаль ташламаларда да, башка төр дәртләндерү чараларында да чагылыш таба.
Эшче белгечлекләргә хөрмәт тәрбияләүнең бер юнәлеше — осталык бәйгеләре. Нәкъ шундый конкурслар барышында яшь буын белән тәҗрибә уртаклашу, һөнәр нечкәлекләрен төшендерү, аның мавыктыргыч якларын ачу мөмкинлеге бирелә. Шушы көннәрдә шәһәребезнең нефть колледжында (элеккеге 56нчы һөнәри лицей) үткән «Һөнәре буенча иң яхшысы» бәйгесе дә шул максатлардан чыгып оештырылды. Анда «Пакер» фирмасы, «Водоканал», «Теплоэнерго», «Нефтемодулькомплект», «ОЗНА акционерлар компаниясе», «ОЗНА-үлчәү системалары», «ПетроТул» предприятиеләреннән, нефть колледжыннан 14 кеше катнашты.
Бәйге 2 өлештән торды. Тәүдә сварщиклар эш технологиясе, хезмәт сагы һәм хәвефсезлеге буенча биремнәр үтәде. Электр һәм газ белән эретеп ябыштыручы һөнәре теоретик әзерлектән тыш, кул-аяклар, гәүдәнең сыгылмалылыгын, кул хәрәкәтләренең төгәллеген, яхшы күз күреме һәм хәтер, игътибарлылык, физик яктан сәламәт һәм көчле булуны таләп итә. Бәйгечеләрнең әлеге сыйфатлары гамәли өлештә тикшерелде. Тәүдә детальләрне чистарту-җыю, корыч көпшәләрне әзерләү гамәлләре башкарылды. Конкурсның иң җаваплы өлеше — бирелгән вакыт эчендә 100*4 диаметрлы көпшәләрне тыгыз һәм сыйфатлы итеп ябыштыру.
... Эретеп ябыштыру эшләре барган остаханәгә килеп кергән кеше тәүге мәлдә үзен чын тәмугка эләккәндәй тоядыр. Һәрхәлдә миндә шундыйрак хисләр туды. Саклагыч киемнәрдәге ир-атлар төгәл хәрәкәтләр белән ялганыш урыннарын ябыштыра, корыч көпшәләрдән көлтә-көлтә ут бөркелә, бүлмә эче төтен-тузанга тулган, тимер чыңлаган тавыштан колаклар тона... Уйлап карасаң, сварщикларның көндәлек хезмәте шулай үтә ич. Мондый эшкә ничек чыдый алар, кайдан илһам алалар, гомумән, нигә шушы белгечлекне сайлыйлар? Шушы һәм башка сорауларга җавап табу өчен бәйгечеләргә мөрәҗәгать итәм. Тәүдә яшь буын вәкиле фикерен ишетик. Нефть колледжының 2нче курс студенты Владислав Можгов өчен һөнәри осталык бәйгесе — киләчәк хезмәт юлындагы тәүге җитди сынау. «Бу минем өчен зур тәҗрибә, чөнки бүген биредә чын һөнәр ияләре җыелган, — ди Владислав. — Биремнәргә килгәндә, минем өчен иң катлаулысы: җөйне матур, шома итеп эретеп ябыштыру булды».