Мондый егетләр булганда күңелләр тыныч!

Яшьләр сараенда армиягә алыначак егетләрне озату кичәсе үтте.
Мәгълүматларга ярашлы, агымдагы елда көзге чакырылышта Үзәк хәрби округ йөкләмәсе буенча Башкортстаннан — 4500, шул исәптән Октябрьскийдан 82 кеше хәрби хезмәткә юлланачак. Шәһәрдәшләр Көньяк, Көнчыгыш, Көнбатыш округларда, Үзәк һәм Төньяк флотта хезмәт итәчәк. Армиягә чакырылучыларның 80гә якын проценты югары яки урта һөнәри белемгә ия. Ягъни, бу егетләр вуз, техникум-колледжларда укып чыккан, бүгенге көндә аларның армиядән кичектереп тору вакыты тәмамланган.
Көзге чакырылыш уңаеннан оештырылган тантаналы чарада Октябрьскийның мобилизацияләүгә әзерлек бүлеге начальнигы Юрий Медведев (Юрий Николаевич «Застава» хәрби-патриотик уенында катнашучыларны Рәхмәт хатлары белән бүләкләде); хәрби хезмәт ветераны Нәзил Фәйзрахманов; шәһәрнең хәрби хезмәткә чакыру бүлеге начальнигы Владимир Бермишев; «Нурул-Ислам» мәдрәсәсе имам-ахунды Мәүлемҗан хәзрәт Сибгатуллин; Сергий атакай катнашты. Иҗат коллективлары әзерләгән матур концерт номерлары чарага ямь өстәп, яхшы кәеф бүләк итте.
Яшьләргә үгет-нәсыйхәтләрен ветераннар да җиткерде: «Армия — ул иң мөһим тәҗрибә, көндәлек тормышта гына өйрәнеп булмый торган сабак. Хәрби хезмәт юлын үткәннәрдә үз-үзеңне тәртипкә салу, җитди карарлар кабул итү кебек сыйфатлар барлыкка килә, мондыйлар рухи һәм физик яктан чыныга. Аңлашыла ки, алдыгызда ниндидер каршылыклар, авырлыклар булачак, әмма югалып калмассыз дип ышанабыз. Сез анда үзегез генә түгел, бүгенгесе көндә республикадан, шәһәребездән армия хезмәтен үтүчеләр шактый. Үзегезне борчыган мәсьәлә буенча тәҗрибәлерәк якташларга мөрәҗәгать итегез, алар сезгә киңәш-гамәлләре белән ярдәм итмичә калмас. Көчле рухлы булыгыз һәм лаеклы, намус белән хезмәт итегез. Сез — безнең дәвамчыларыбыз, ышанычыбыз! Хәерле сәгатьтә!»
Искәрмә: 2017 елда армиягә кагылышлы берничә яңа закон гамәлгә керде. Хәзер колледжда укучыларны, 20 яше тулуга карамастан, хәрби хезмәткә алуны кичектереп торалар. Ә инде 444нче федераль законга ярашлы, сәламәтлек торышы буенча хәрби билет алган 18-27 яшьтәге егетләргә өстәмә тикшерелү үтәсе була. Аларның физик торышы уңай якка үзгәргән очракта, армиягә алыначаклар.