Башкортстан халкы тәүлек әйләнәсенә дәүләт һәм муниципаль уңайлыкларга ия булачак

Русия Икътисадый үсеш министрлыгында хәбәр ителгәнчә, беренче чиратта 24/7 режимына гражданнар өчен социаль әһәмиятле булган хезмәтләрне күчерәчәкләр, алар арасында — «социаль казначылык» уңайлыклары, мәсәлән, пенсияләр, пособиеләр һәм компенсацияләр, социаль ярдәмнең башка төрләрен билгеләү һәм түләү. Моннан тыш, оптимальләштерү бизнес өчен хезмәтләргә дә юнәлтеләчәк, бу лицензияләр һәм башка кирәкле документлар алуны җиңеләйтәчәк.

БР Хөкүмәте Премьер-министрының беренче урынбасары – Башкортстанның икътисадый үсеш һәм инвестицион сәясәт министры Рөстәм Моратов сүзләренә караганда, бүген Башкортстанда Русиядә иң масштаблы күп функцияле үзәкләр челтәре эшли, ул көн саен 350 дәүләт һәм муниципаль хезмәт буенча 10 меңгә якын мөрәҗәгать итүчегә ярдәм итә.

БР Күпгамәлле үзәк директоры Наталья Куприянова билгеләп узганча, Башкортстанда Русия Хөкүмәте раслаган 24/7 режимында гражданнарга күпчелек дәүләт уңайлыкларын күрсәтүгә этаплы күчү Концепциясен гамәлгә ашыру өчен кирәкле база әзерләнгән.

29-30 сентябрьдә Уфада Концепцияне гамәлгә кертү тәҗрибәсе белән «пилот» — төбәкләр вәкилләре уртаклашачак. Биредә «Минем документлар» VI Бөтенрусия дәүләт хезмәтләре үзәкләре форумы узачак. Форумның эшлекле программасы үз эченә дәүләт һәм муниципаль уңайлыкларны оптимальләштерү мәсьәләләренә һәм Күпгамәлле үзәкнең яңа максатларына багышланган пленар утырышны һәм ике стратегик сессияне ала.

Форум «Русиянең иң яхшы күпгамәлле үзәге» Бөтенрусия конкурсына йомгак ясау белән тәмамланачак. Анда «КГҮнең иң яхшы төбәк челтәре», «КГҮнең иң яхшы универсаль белгече» һәм «КГҮнең иң яхшы проекты» номинацияләрендә җиңүчеләр игълан ителәчәк.

– Катнашучыларны бәяләү күпсанлы критерийлар, шул исәптән күрсәтелә торган уңайлыкларның төрлелеге, мөрәҗәгать итүчеләрнең фикерләре, эш графигы һәм аның һәркемкә уңайлы булуы, гражданнарга хезмәт күрсәтүнең дистанцион формалары, өстәмә уңайлыклар һәм сервислар, цифрлаштыру дәрәҗәсе буенча үткәрелә, — дип хәбәр итте Русия Икътисадый үсеш министрлыгының халыкка дәүләт хезмәтләрен күрсәтү сыйфатын тәэмин итү һәм дәүләт функцияләрен үтәү департаменты директоры Елена Казмерчук.