Туган як
+11 °С
Болытлы
Барлык яңалыклар
Төрлесеннән
11 март 2018, 14:43

Күп калмады сайлауга да...

2018 елның төп сәяси вакыйгаларының берсе — илебез Президентын сайлау көне килеп җитте.

2018 елның төп сәяси вакыйгаларының берсе — илебез Президентын сайлау көне килеп җитте.
Бу атнада, 18 мартта үтәчәк ул чара. Шул уңайдан шәһәребездә яшәүче өлкән буын вәкилләренә мөрәҗәгать итеп, сайлау турындагы хатирәләре белән уртаклашуын үтендек. Кайсыларынадыр сайлау комиссиясе составында эшләргә туры килгән, ә кемнәрдер бары тик сайлаучы сыйфатында катнашкан. Мин үзем хәтерләвемчә, сайлау көне — безнең өчен зур бәйрәм кебек була иде. Әти-әниләрнең берәрсенә ияреп барырга җае чыкса, үзебезне иң бәхетлеләрдән саный идек. Чөнки бу көнне төрле җирләрдән кибетләр килә (элек кибеттә сатылмаган тәм-томнар сатуга чыга), артистлар чыгыш ясый... Мәгариф тармагы ветераны, Русия мәктәпләренең атказанган укытучысы, шәһәребездә хөрмәтле кешеләрнең берсе — Халидә Хәнипова хәтерендә сайлау нинди хатирәләр калдырды икән?
— Беренче истәлекләр дисез... Бу бик күптән булды инде. 1937 елның җәе иде. Мин урналарны да, ничек тавыш биргәннәрен дә күрмәдем. Әмма, Гафуров авылы халкының олысының-кечесенең телендә «Сайлау» дигән бер яңа сүз һәм зур бәйрәм хисе минем, 10 яшьлек баланың, күңелендә гомерлек матур күренеш булып калды. Клуб ишек алдында көн буена халык бу тансык бәйрәмне куанып, рәхәтләнеп тантана итте. Ә без, балалар, шатлыклы җырлар һәм шигырьләр белән машина кузовына (сәхнә шунда) кат-кат менеп чыгыш ясадык. Шул көнне башкарылган җырлар, шигырьләр әле дә хәтеремдә:
«Без — урыс, башкорт, татар,
мари, чуваш,
Без — элекке телсез кешеләр,
Без — бөек гаиләнең әгъзалары,
Без — туганнар, якын күршеләр.
Һәркем өчен бу көн хәл ителер,
Яшәр бәхете, илебез туклыгы.
Хәл ителер бу көн — алгы җиңү,
Илбез көче, чигебез ныклыгы».
Шунда сөйләгән шигыремнән өзек. Ул бүген дә көнүзәк кебек.


— Халидә апа, ә беренче тапкыр тавыш бирүегезне хәтерлисезме?
— Беренче тапкыр тавыш бирүдә катнашуым 1946 елда Иске Туймазы авылында булды. Бу сайлауда инде мин комсомол секретаре буларак, сайлауга килүче халыкка мәдәни чаралар оештырырга җаваплы идем. Сайлаучылардагы сугыштан соңгы яңа сулыш, күтәренке рух алдагы сайлауларны үткәрүгә дә нигез салды диясем килә. Чөнки шушы сайлаулардан башлап, миңа яшьрәк чакта участок сайлау комиссиясендә әгъза сыйфатында, аннан озак еллар секретарь, тагын озак еллар рәис вазифасында Советларга төрле дәрәҗәдәге сайлауларны җитәкләргә туры килде. Сайлаучыларның төгәл исемлеген барлау, авылны округларга, унйортларга бүлеп, агитаторлар билгеләп, семинарлар үткәрү һ. б. оештыру мәшәкатьләре булса да, бу эшләргә авыл интеллигенциясе җәлеп ителә һәм һәркем карусыз эшли иде. Шул еллардагы бергәлек, бердәмлек, оешканлыкны бик сагынып искә алам.
Күрсәтелгән кандидатлар белән очрашулар, сайлау алды җыеннары үткәрү, сайлау көнен халык күңелендә онытылмаслык итеп оештыру өчен җаваплылык җиңел дә булмагандыр, әмма ул мәҗбүри үтәлергә тиешле гадәти вазифа кебек кабул ителүе һәм ихлас үтәлүе хак.
Бер елда икешәр сайлау үткәргән чаклар булды. Мин сайлаучыларның үз хокукларын үтәргә теләк белән, рухлану хисе белән, дәррәү килүләрен күзәтеп, сайлау гамәленә уңай һәм җитди карашларын тоеп яшәдем. Иң хәлиткеч мизгелләрдән — урналарны ачып, депутатлыкка тавыш бирелгән бюллетеньнәрне санау, протокол тутырудагы гаделлек, алданрак барып, район үзәк сайлау комиссиясенә нәтиҗәләрне тапшыргач кына, башкарган эшеңнең уңышлы үтәлешенә канәгатьлек кичерү.
Хәзер инде һәр сайлау көнне хатирәләр яңартып, чагыштырып, анализ ясап утырам.

— Заман үзгәрә, аның белән бергә халык та үзгәрә. Сайлауларга карашыгыз үзгәрдеме? Бүгенге яшьләргә ни әйтер идегез?
— Хәзер ни... Җан исән чакта дөнья гаменә ваемсыз калып булмый инде. Җәмгыять бик үзгәрде. Балалар, оныклар ничек яшәр дигән борчулы уйлар килә.
Сайлауларга килсәк, сайлау системасында әлләни үзгәреш юк та кебек. Шулай да элек үзебезнең җирлектә сайланган депутат халык белән бәйләнештә була, аларның гозерләрен үтәүдә хәстәрлек күрә иде. Әлеге Президент сайлавына килгәндә, мин чын күңелдән илебезнең көчле, куәтле держава булып калуын, бөтен төбәкләрдә халыкларның бердәм, дус гаилә булып, гыйлемгә омтылып яшәвен телим һәм шуның өчен тавышымны бирәчәкмен. Өлкәннәр дә, яшьләр дә, балалар да якты, бәхетле тормышта яшәсеннәр иде. Ә моның өчен тавыш бирергә хокукы булган бар кеше дә битараф калмаска, үз тавышын, үзе лаек дип тапкан кандидат өчен тавыш бирергә тиеш, дип исәплим.

— Әңгәмегез өчен зур рәхмәт сезгә, Халидә апа!
Читайте нас: