Салым түләү кәгазе килмәсә нишләргә?

— Салым түләү кәгазе кайсы очракта килмәскә мөмкин?
— Белдерү кәгазе һәм квитанцияләр салым түләү көненә бер ай кала почта бүлекләре аша һәр кешегә җибәрелә. Әмма берничә очракта мондый кәгазьләр килмәскә мөмкин. Беренчесе — милек иясенең салымны бөтенләй түләмәскә хокук бирүче ташламалары булганда. Икенчесе — салым күләме 100 сумнан кимрәк булганда. Һәм өченчесе — физик зат федераль салым хезмәте сайтында (www.nalog.ru) «Физик затларның шәхси кабинеты»нда теркәлгән очракта. Соңгыларына түләү хәбәре электрон рәвештә шәхси кабинетка килә. Салымны әлеге сервис аша онлайн режимда яки квитанцияне чыгарып, банкка барып түләргә мөмкин.
Башка очракларда белдерү кәгазе килмәве турында инспекциягә хәбәр итәргә яки федераль салым хезмәтенең «Физик затларның шәхси кабинеты» электрон сервисы аша мөрәҗәгать юлларга кирәк. Күчемсез милеге яки транспорт чарасы булып та, беркайчан да квитанция алмаган һәм ташламалар сорамаган гражданнарның бу турыда теләсә кайсы салым органына хәбәр итүләре шарт.

— Шәхси кабинетны ничек ачарга?
— Аның өчен үзегез теркәлгән биләмәдәге салым инспекциясенә мөрәҗәгать итеп, логин һәм пароль алырга кирәк. Моның өчен паспорт һәм ИНН кәгазе сорала. Парольне оныткан очракта яңартып чыгарга мөмкин.

— Күп кеше милек салымы артып килде, ди.
— Бу закондагы үзгәрешләргә бәйле. 2015 елдан милеккә салым аның кадастр бәясеннән чыгып исәпләнә. Элек ул инвентаризация бәясеннән иде. Законга ярашлы, еллык кадастр бәясеннән исәпләнгән салым берьюлы түгел, акрынлап биш ел дәвамында гамәлгә керә. Ягъни киметүче коэффициентлар куллану каралган. Беренче елны — 0,2, икенче елны — 0,4, өченче елны — 0,6, дүртенче елны — 0,8, бишенче елны 1 коэффициенты белән. 2016 елда 0,4 коэффициенты белән исәпләнде. Әлеге саннар белдерү кәгазендә күренә. Моңа бәйле салым суммасы да артып килә.

Искәрмә: вакытында салым түләмәүчеләргә түбәндәге чаралар кулланыла — РФ үзәк банкының рефинансирование ставкасыннан чыгып, 2 декабрьдән пеня исәпләнә башлый. Салым күп булган саен, пеня да арта. Бурычын түләмәүче һәр физик затка кисәтү кәгазе юллана. Арытаба да түләнмәсә, эш судка җибәрелә, аның карары нигезендә суд приставлары эшкә керешә.