Йолдызлар кабынган җирдә

Шушы көннәрдә Халыклар дуслыгы йортында шәһәр мәктәпләре укучылары арасында «Яшь йолдызлар» татар җырын башкаручылар бәйгесе үтте.
Конкурс милли мәдәниятебезнең гореф-гадәтләрен саклау һәм үстерү,
җыр-моңга ия булган сәләтле балаларны ачыклау максатында оештырылган. Башкортстанның атказанган укытучысы, шәһәрнең татар теле һәм әдәбияты укытучыларының методик берләшмә җитәкчесе Мөслим Нурмөхәмәт улы Газиев җитәкчелегендә башлана. Аның нияте белән башланып киткән шушы бәйге инде 30нчы ел рәттән мәктәп сәхнәләрендә үз йолдызчыкларын кабыза.
Юбилей бәйгене шәһәр мәгариф бүлегенең мәгълүмати-методик кабинеты җитәкчесе Лариса Тимербаева ачты.
— «Яшь йолдызлар» бәйгесе шәһәребез тарихына ныклы кереп, матур бер гадәткә әверелде. Һәр чыгыш ясаучы моңлы җырлары белән туган ягыбызны данлауга үз өлешен кертә. Балаларда халык җырына мәхәббәт уяткан, аларга һәрьяклап ярдәм күрсәткән ата-аналарга, талантларын үстерергә булышлык иткән педагогларга зур рәхмәт сүзләрен җиткерәсе килә. Бүгенге бәйгедә иң лаеклар яңа йолдызлар булып кабынсын, — диде ул.
Алып баручылар чыгышларга бәя бирәчәк жюри белән таныштырды. Шәһәр мәгариф бүлегенең туган телләр буенча методисты Гүзәл Венер кызы Латыйпова җитәкчелек иткән жюри составына Мөслим Газиев, музыка көллиятенең хөрмәтле укытучысы, Башкортстанның атказанган мәдәният хезмәткәре Галия Мусина, БРның атказанган мәдәният хезмәткәре, 2нче балалар сәнгать мәктәбе педагогы Тамара Сәйфуллина, коммуналь-төзелеш колледжы методисты Сания Газиева, «Нур» татар дәүләт театры артисты, якташыбыз Гөлназ Биктимерова керде. Әйткәндәй, шәһәрнең 11нче мәктәбен тәмамлаган Гөлназ сәнгать дөньясына беренче адымнарын нәкъ әлеге бәйгедә ясаган. Ул мәктәптә укыган чакта конкурсны ел да бәйрәм кебек көтеп алуын белдерде, барлык катнашучыларга уңышлар теләп, тамашачыларга үзенең матур, моңлы җырларын бүләк итте.
Бәйге өч яшь төркемнәрендә оештырылды: кече төркем (1-4 сыйныфлар), урта төркем (5-8 сыйныфлар), өлкән төркем (9-11 сыйныфлар).
Конкурсны 12нче мәктәп укучысы Алинә Фәрвазова «Яңа күлмәгем» җыры белән башлап җибәрде. Талантлы яшь җырчылар бер-берсен алыштырып торды. Бәйгедә барлыгы 11 мәктәптән 20 укучы катнашты. Илвир Миңнуллин, Илвира Хәкимова, Данил Мәсәлимов, Дәринә Шәрипова, Камилла Әлмөхәмәтова һәм башкаларның чыгышлары ихлас алкышларга күмелде. Бәйгечеләр һәм аларны әзерләгән укытучылар җыр сайлауга җитди караган. Яшь талантлар татар халык җырларын, күренекле татар, башкорт композиторларының әсәрләрен башкарды. Халык арасында популяр «Кышкы романс», «Сандугачым», «Җыйдым җиләк» җырлары бу көнне тагын да үзенчәлекле яңгырады. Татар-башкорт эстрадасында киң танылу алган Радик Юльякшин җырларын да тәкъдим итүчеләр булды. Әйе, яшьләр аны бик яратып тыңлый. Радикның җырларын ятлап, туган телгә тартылулары, әлбәттә, шатлыклы күренеш.
Бар конкурсантлар да чыгыш ясагач, жюри җыелып киңәш итте. Без шул арада конкурсантлар, залда утыручылардан тәэссоратларын сораштык.