Эшнең ертыгы юк

Марсель Ногманов өч елга якын дворник булып эшли. «Эшнең ертыгы юк. Күңел биреп эшләргә генә кирәк. Мин үзем башкара торган эштән оялмыйм», — диде шәһәрдәшебез.
Свердлов урамындагы 74нче йортта яшәүче Валентина Полилова берь­юлы берничә ишегалды территориясенә хезмәт күрсәтүче Марсель Ногмановка редакция аша рәхмәт әйтергә килгән.
Тырыш дворник эшли торган ишек аллары арасында Губкин урамындагы 26, 28, 30нчы, Свердлов урамындагы 74нче, Ленин проспектындагы 14нче күп фатирлы йорт алды территорияләре бар.

— Марсель искиткеч кеше, яхшы хезмәтчән, аның ярдәмендә безнең ишегалды һәрвакыт чиста һәм тәртиптә, — диде Валентина Николаевна. — Сөенеп туя алмыйбыз — тирә‑як ялт итеп тора.
Марсель 6нчы торак‑эксплуатация участогына («Бердәмлек» ҖЧҖ) эшсез калганнан соң урнаша.

— Урамда дворникны очраттым, янына килдем, сораш­тым, шунда ук аның белән торак‑эксплуатация участогына киттек, эшкә дә урнаштым. Башкара торган эшемнән кыенсынмыйм, теләсә нинди хезмәт мөһим. Ә безнең һөнәргә кешеләр бик ашкынмыйлар. Кемгәдер салкын, кемгәдер физик яктан авыр. Хорафатлар да үз ролен уйный, — дип сөйли Марсель.

Ир‑атка саф һавада эшләү ошый. Ул барлык яшәүчеләр дә ачык күңелле булуын, низаглар чыкмавын да билгеләп үтте.
Ел фасылының гомумән әһәмияте юк — беренче карашка авыр кебек тоелган кышын хәтта җиңелрәк тә, дип саный дворник.

Физик хезмәт куркыт­мый — киресенчә, ир‑ат монда үзен формада тоту мөмкинлеген күрә. Марсель — волейбол буенча спорт мастерына кандидат. Хәзер, аның сүзләренчә, спорт белән шөгыльләнергә вакыт калмый диярлек. Эш коткара. Урам себерүчедә ул физик яктан гади түгел. Елның һәр фасылы сезон мәшәкатьләре белән үрелеп бара. Әмма Ногманов кыенлыклар алдында югалып калмый.

Марсельны җитәкчелек тә мактый. «Бердәмлек» җәмгыяте директоры Айдар Шәмсуллин сүзләренә караганда, Ногманов алтын бәһасенә тиң эшче.
— Мәрхәмәтле, төгәл, хезмәт сөючән — безнең Марсель нәкъ шундый. Ул үз эшен белә, һәм аңа карата шелтәләр юк, — диде ул. 

— Марсельгә башкарган хезмәте өчен зур рәхмәт. Без аның эшен кадерлибез һәм аңа бик рәхмәтлебез. Аңа нык сәламәтлек, шәхси тормышында бәхет һәм бары тик игелекләр генә телибез! Җиңел эш көннәре күбрәк булсын, — диде милекчеләр.

Анастасия НИГЪМӘТУЛЛИНА