Матурлык яшәтә дә, яшәртә дә!

Урамда алтынсу көз, әбиләр чуагының иң матур көннәре. Шушы чорда күркәм бәйрәм — Өлкәннәр көнен билгеләп үтәбез.
Гомер көзләренә керү бераз моңсу булса да, икенче яктан шатлыклы да. Каядыр ашыгасы, эшкә йөгерәсе юк. Балалар да үз тормышлары белән яши, оныклар үсеп килә. Якын кешеләреңнең бәхетенә куанып яши алу үзе зур бәхет бит.

— Дөрестән дә, өлкәннәр безгә күпчелектә балалары, якыннары киңәше белән генә мөрәҗәгать итә, — дип Оксана да хезмәттәшенең фикеренә кушыла. — Алар бу карарны үзләре кабул итә алмый, чөнки төс-кыяфәтләренә нинди дә булса яңалык кертү, кискен үзгәрүдән куркалар. Шулай да арада яшьлек гүзәллеген җуймаган, ачык йөзле, ихлас күңелле апалар да очрап тора. Мисалга, бервакыт миңа 80 яшьлек ханым мөрәҗәгать итте. Чын татар апасы: яулык ябынган, зәвык белән киенгән, мөлаем йөзле. Җиңелчә төсмеләр ярдәмендә бизәндереп җибәргән идем, ул матур гөлдәй тагы да ачылып, яктырып киткәндәй булды! Аның тормыш иптәше дә сокланып, комплиментлар яудырды. Бу уңайдан хатын-кызларның гына колагына әйтер сүзем бар: ир-атлар үз-үзен карап-тәрбияләп торган, килешле киенгән гүзәл затларны үз итүен берүк онытмагыз. Шуңа күрә, матур, ягымлы булыгыз, хатын-кызларга гына хас нәзакәтлелекне җуймагыз.

Оксана матурлык өлкәсендә 6нчы ел эшли. «Бирегә мине язмыш үзе китерде, — ди ул. — Балачактан ук тегү-чигү эшләрен яраттым. Әниемне бизәндерү бик ошый иде. Бүген мин сабый чактагы хыялларны томышка ашыра алам. Кешеләргә шатлык өләшү, үз хезмәтеңнең уңай нәтиҗәсен күрү зур сөенеч, илһам өсти. Нинди генә халәт-кәефтәге хатын-кызлар мөрәҗәгать итми миңа! Декретта утырган, башы-аягы белән көндәлек мәшәкатьләргә «чумган» гүзәл затлар да килә. Мондыйлар белән эшләгәндә берникадәр дәрәҗәдә психологка әвереләсең. Хатын-кызда үз-үзенә, нәфис-матур булуына ышаныч уяту зарур! Әгәр дә моңа ирешәсең икән, бу — хезмәтеңә иң югары бәя булачак. Мисал өчен, миндә макияж ясаткан яшь әнидән килгән кайтавазны ишеттерәсем килә. «Оксана, зур рәхмәт сезгә! Сез мине бизәндереп кенә калмадыгыз, яшәүгә дәрт тә уяттыгыз. Салоннан кайткач, дөрес туклануга күчәргә карар иттем. Һәм... 90 килодан 65кәчә ябыгуга ирештем! Бу — минем өчен бик яхшы нәтиҗә. Сез тормышыма яңа сулыш, ямь керттегез!»...

Матурлык салоны осталары файдалы киңәшләре белән дә уртаклашты. Өлкәннәргә бизәнгәндә артык чагу булмаган, «җылы» төсмерләрне кулланырга киңәш ителә икән. Кашларны даими рәвештә төзәткәләп, табигый төскә якын итеп буяу кулай. Бу күзләрне ачыграк, яктырак итә. Чәчләрне да даими тәрбияләп, җыйнак төстә йөртергә кирәк. Әлбәттә, прическа сайлаганда, бизәнгәндә күпчелек кеше гадәттә эчке тоемлауга нигезләнеп эш итә. Бу — бер карашка дөрес гамәл. Әмма матурлык салоны белгечләре киңәшләренә дә «колак салу» комачауламас. Ни генә димә, биредә төрле холык һәм төс-кыяфәттәге кешеләр белән эшләп, тәҗрибә туплаган үз һөнәре осталары хезмәт куя.

Әйе, без елдан-ел яшәрә бармыйбыз, картлык кайчан да булса һәрберебезнең ишеген кагачак. Әмма гомер көзенә кергәндә дә матур булып калырга мөмкин. Моның өчен өй шартларында тән тиресенең барлык катламын да тәрбияләп тору мөһим. Яшь чактан ук бит тиресен дөрес итеп карасаң, даими рәвештә чистартып һәм дымландырып торсаң, олы яшьтә дә бик яхшы күренергә мөмкин.

Косметологка, матурлык салоннарына мөрәҗәгать итү дә яхшы нәтиҗәләр бирә. Соңгысын инде проектыбыз герое — Венера ханым образында күрә аласыз. Фотоларга гына күз салыгызчы...