«Геология — минем язмышым»

Без бик кызыклы һәм гаҗәеп дөньяда яшибез.

Без бик кызыклы һәм гаҗәеп дөньяда яшибез.
Тормыш сукмакларында очраган төрле хәл-вакыйгалар эчендә «кайныйбыз», яңа дуслар табабыз, ачыш-казанышларга ирешәбез һәм, әлбәттә, насыйп ярларны очратабыз. Соңгысы инде өлкәннәр әйткәнчә, Ходай кулында. Кемдер бәхетенә озын-озак юллар, еллар аша килә, ә икенчеләр мәхәббәтен уйламаганда-көтмәгәндә таба. Бүгенге язмам герое белән дә шундыйрак хәл булган. Нефть колледжының 5нче курс студенты Рамазан Миңнегәрәев хатыны Арина белән нәкъ шушы уку йортында танышкан. Икесе дә «Геология һәм нефть һәм газ яткылыкларын эзләү» бүлегендә бер курста, бер төркемдә укый алар. Танышу-аралашулары ничек башланган икән? Эш шунда, колледжда күп сандагы чаралар, конференцияләр даими оештырыла. Арина да, Рамазан да аларда актив катнаша, шул рәвешле оештыру-үткәрү эшләрендә гел бергә була. Яшьләрне бу бик якынайта, алар аралашып китә. Бердәм эшчәнлек, охшаш кызыксынулар һәм, әлбәттә, мәхәббәт яңа тормышка нигез сала. Арина һәм Рамазан бүген инде законлы никахта, бер-берсенә терәк-таяныч булып яшиләр, укыйлар.
Миңнегәрәевләр белән танышуым ничек килеп чыкты соң? Шушы көннәрдә сөенечле хәбәр алдык: шәһәребез студенты «Гамәли геология, тау, нефть-газ эше һәм геодезия» белгечлекләре буенча Бөтенрусия олимпиадасы җиңүчесе булган! Шул рәвешле мин сәләтле студентларны тәрбияләүче нефть колледжына юл алдым. Рамазан Миңнегәрәев белән әңгәмәбезне укучыларга да тәкъдим итәсем килә.

— Рамазан, Бөтенрусия олимпиадасына ничек эләктең?
— Олимпиаданың шәһәребездә үткән өлешендә беренче урын алдым. Һәм Бөтенрусия күләмендәге конкурста көч сынарга тәкъдим иттеләр. Шул рәвешле Русиядә халык саны буенча өченче урын алып торучы Новосибирск шәһәренә сәфәрем башланды. Олимпиада нәкъ шунда, Себер геофизик колледжы нигезендә үтте. Беренче көнне Новосибирск өлкәсенең Хөкүмәт бинасында олимпиаданы ачу тантанасы оештырылды. Арытаба без квест рәвешендәге уенда катнаштык. Ул илнең 13 төбәгеннән килгән студентларны үзара таныштыру, дуслаштыру максатын күзаллады.
Олимпиада геология, минералогия һәм петрография, мәгълүмати технологияләр, хезмәт хәвефсезлеге һәм икътисад өлкәсенә караган темаларны үз эченә алды. Һәр төркемдә иң яхшы студент билгеләнде. Беренче көнне тест биремнәрен үтәдек, инглиз теленнән тәрҗемә ясадык. Мин «Коллектив эшчәнлеген оештыруда иң яхшы нәтиҗә» төркемендә җиңүгә ирештем. Әмма бу конкурсның әле башы гына иде. Иң авыры икенче көнне булды. Безгә геологик һәм радиометрик тикшерү үткәрү, шулай ук кыр лагере урнаштыру бурычы куелды. Табигый шартларда, геологик чүкеч ише җайланмалар белән эшләү гамәли биремнәргә карата күпкә авыррак. Өченче көнне белгечлекләр буенча биремнәр үтәдек. Мин тау токымы үрнәге булган кернга бәяләмә бирдем. Иң ахырдан, гомум нәтиҗәләр буенча җиңүчеләрне билгеләделәр (автордан: Рамазан 17 балл аерма белән Бөтенрусия олимпиадасы җиңүчесе исемен яулый!).

— Новосибирскта алган иң көчле тәэссоратларың?
— Олимпиаданы оештыру дәрәҗәсе бик ошады. Гамәли геология буенча мондый күләмдәге чаралар Русия тарихында тәүге тапкыр үткәрелә. Бу аңа аеруча олы мәртәбә биреп тора. Новосибирск сыман зур шәһәрләрдә мин беренче тапкыр. Әлбәттә, биредәге истәлекле урыннар онытылмас хатирәләр калдырды. Аларның берсе — шәһәрнең символы булган опера һәм балет дәүләт академия театры. Ул Русиядәге иң зур сәнгать учакларының берсе санала. Театрда без «Жизель, или Вилисы» исемендәге «фантастик балет» карадык. Олуг бинадагы дулкынландыргыч тамаша, «җанлы музыка», талантлы артистлар... Боларның һәммәсе дә күңелдә хисләр өермәсе тудыра.
Янә дә бер истәлекле урынга тукталасым килә. Бу — 9 катлы йорт тирәнлегендә урнашкан Борок чыганагы. 100 еллык тарихка ия шушы карьер Новосибирск тормышында әһәмиятле урын алып тора. Биредән чыгарылган вак таш, гранит шәһәрнең мөһим объектлары төзелешендә киң кулланыла. Чыганак биләмәсендәге су шарлавыклары аңа аеруча ямь өсти.

— Олимпиаданың уңай яклары?
— Беренчедән, бу чара миңа Русия күләмендәге зур бәйгедә көчемне сынау, икенчедән, башка төбәкләрдә яшәүче фикердәшләр белән тәҗрибә уртаклашу, яңа дуслар табу мөмкинлеге ачты. Бер уңайдан олимпиадага әзерләнергә булышкан остазларымны да билгеләп үтәсем килә: Татьяна Цыбульская, Гөлшат Галимова, Ирина Лобанова, Елена Антонова, Валентина Чеботарева, Рәмзия Гыйльфанова. Файдалы киңәшләрегез, төпле белем бирүегез өчен зур рәхмәт сезгә!

— Колледжда уку чорында нәрсәләргә ирештең?
— Уку еллары минем өчен ачыш-казанышлар вакыты буларак истә калачак. Баштагы мәлләрдә геология өлкәсе белән бөтенләй таныш түгел идем. Тора-бара кызыксынуым артканнан-артты. Үзем өчен күп яңа мәгълүмат алдым. Ә иң мөһиме — биредә сөеклем Аринаны очраттым!

— Ял вакытларын ничек үткәрәсең?
— Агымдагы елда игътибарны күбрәк укуга бүләргә туры килә. Шулай да Арина белән кинога барырга, яисә паркта йөрергә вакыт табабыз. Спорт турында да онытмыйбыз: бу максаттан «Дружина» клубына айкидога йөрим, ә хатыным йөгерү белән шөгыльләнә.

— Иң зур хыялың нинди?
— Тату һәм бәхетле гаилә булып яшәү. Тормышымда зур өлеш алып торган геология өлкәсендә ачышлар ясау, бәлки, яңа яткылык ачуга ирешермен (көлә). Дөнья буйлап сәяхәт итү, чит ил халыкларының мәдәнияте, тормышы белән танышу.
Әйткәндәй, Рамазан нефть колледжында оештырылучы бәйге-олимпиадаларда, фәнни-гамәли конференцияләрдә, яшьләр форумнарында даими катнаша. Тормыш иптәше Арина да аннан калышмый. Ул Бөтенрусия олимпиадасының төбәк өлешендә 3нче урын яулаган, БР Башлыгы стипендиаткасы. Яхшы билгеләргә генә өлгәшүче Миңнегәрәвләр «Кызыл диплом»га дәгъва итә. Арина һәм Рамазанга гаилә бәхете, имин тормыш, киләчәктә дә гел уңышлар юлдаш булуын телибез!

Л. ГАБИТОВА, автор фотосы.

Читайте нас:

Регистрационный номер ПИ № ТУ 02-01360 от 23 июля 2015 г.

Телефон

8(34767) 6-03-28

Электрон почта

[email protected]

Адресы

452614, г. Октябрьский, ул. Чапаева, 18; 2 этаж, 7, 8, 9 каб

Реклама хезмәте

8(34767) 6-12-51

Редакция

8(34767) 6-03-00, 8(34767) 6-03-28, 8(34767) 6-12-51

Кабул итү бүлмәсе

8(34767) 6-03-28

Хезмәттәшлек

8(34767) 6-03-00, 8(34767) 6-03-28, 8(34767) 6-12-51

Кадрлар бүлеге

8(34767) 6-12-51, 8(34767) 6-75-35