Һәр һөнәрнең — үз кыйбласы

«Тулы гаиләгә әверелеп беттек»
Югарыда телгә алынган өченче участокта җәмгысе дүрт оператор мәшгуль. Коллектив дус-тату, бердәм, уңган. Гомер бакый сайлаган һөнәрләренә тугрылык саклый ахирәтләр. Галина Шалахова, мәсәлән, бер үк участокта (!) 43 ел хезмәт куя. Галина Стрекалова җылылык челтәрләре өлкәсендә — 42, Нурия Артеменкова 33нче елын эшли. Гөлфинә Борханова әлеге тармакка килгәнгә кадәр төрле төзелеш оешмаларында эшләгән. 1983 елда операторлыкка укыган. Җылылык челтәрләрендә — 2003 елдан. Һәр оешма вәкиленең — шәхси яшәеш-хезмәт, үзенә хас камилләшү сәхифәсе, кыскасы. Әмма уртак сыйфатлар да җитәрлек. «Һөнәребезне бик яратабыз, — ди ханымнар. — Башкача мөмкин дә түгел. Ияләшә алмаганнар, тискәре гамәлләрдән арынырга теләмәгәннәр шунда ук «сыпырту» ягын карый». Ә инде туган коллективыңа күңелең белән берексәңме... «Икенче йорт»ларыннан тыш тормышны бөтенләй күзалламый хезмәттәшләр. «Тулы гаиләгә әверелеп беттек, — диләр шаяру катыш. — Киңәшләшәбез, хәл-әхвәл белешеп торабыз. Эштән соң да аралашабыз. Яшьләребезгә хәтле бер чама бит, бер-беребезне яхшы аңлыйбыз...»
Искитмәле, мавыгу-шөгыльләренә хәтле охшаш икән лә бүгенге танышларымның. Кул эшләренә маһирлар, аш-суга осталар. Бакча, йорт мәшәкатьләре дә чит-ят түгел үзләренә. Җыр-моңга гашыйклар. Мисалга, Галина Шалахова шактый еллар үзешчән сәнгать түгәрәкләрендә катнашкан. Спорт белән шөгыльләнергә дә вакыт табалар. Гөлфинә Галләм кызы, мәсәлән, мәктәп елларыннан ук йөгерү, сикерү буенча ярышларга мөкиббән. Әле дә яраткан спорт төрләреннән ваз кичми... Йомгаклап әйткәндә, күңелсезләнеп утырырга сәбәп юк. Бу җәһәттән профсоюз оешмасы җитәкчесе Анжела Куприяновага рәхмәтен юллый операторлар. «Ел әйләнәсендә төрле ярышлар үткәрелә тора. Табигать кочагында ял итү дә онытылмый. Биредә эшләүчеләрнең балалары, оныклары катнашлыгында концертлар даими оештырыла. Тамашаларга күмәкләп йөрибез. Анжела Игоревна тырышлыгында барысы да».
Форсаттан файдаланып, әңгәмәдәшләрем турыдан-туры җитәкчеләре Анатолий Васильевичка да рәхмәтен белдерә: «Байтак еллар аның кул астында эшлибез. Ягымлы, игътибарлы, кеше хәленә керә белүче ир асылы. Оештыру сәләте зур... Гомумән, тулаем алганда, җәмгыять җитәкчелеге эшеннән канәгатьбез. Хаклы ялдагыларга ихтирамлы мөнәсәбәт саклана. Теләге, көч-куәте булган пенсионерлар сөйгән хезмәтеннән, иптәшләреннән аерылырга уйламый да. Һәркем үз урынында чөнки. Бәхет түгелмени бу?!»

Горурланырлык җирлек бар
Аңлашыла ки, «бәхет» төшенчәсе күктән иңми. Эленке-салынкы йөрүчеләрне өнәп җиткерми ул. Абруй-хөрмәт тә үзеннән-үзе пәйда булмый. Ярыйсы тир түгәргә, һөнәр баскычлары буйлап акрынлап «үрмәләргә» туры килә тәүдә. Мәкалә геройларыбыз яулаган биеклекләр, күпсанлы Рәхмәт хатлары, Мактау кәгазьләре, һөнәри бәйге җиңүләре дә, һичшиксез, фидакарь хезмәт җимеше. Һәркайсы мактауга лаеклы. Нурия Шәмсетдин кызы турында берничә юл өстәү язык булмастыр. Аның казанышлар кенәгәсендә — югары дәүләт бүләкләре: БР торак-коммуналь хуҗалык министрлыгының Мактау кәгазе; «Октябрьсктеплоэнерго»ның Дан китабында теркәлү... Хаклы рәвештә горурлана оешма үз эшчәннәре белән. Яшьләргә үрнәк алыр җирлек бар. «Егет-кызларга теләгебез: батыр-кыю булыгыз; җентекләп һөнәр серләренә төшенегез. Шул чакта уңыш та озак көттермәс. Бары тик ялкауланмаска, «озын акча» көтеп ятмаска гына кирәк», дип сөйләшүгә нокта куя хезмәт ветераннары. Килешмичә булмый, җәмәгать. Шәхси тәҗрибәсеннән чыгып киңәш-нәсихәтен бирә ич өлкәннәр...
«Операторлар, имтиханга!» Ахирәтләр өчен чираттагы сынау көне икән бүген. Хушлашабыз. «Бәхетле билетлар» эләксен үзләренә... Хәер, төптәнрәк уйлап карасаң, яшәешебез үзе үк даими имтихан тотуга корылган түгелме? Язмыш галиҗәнәпләре «яудырган» бихисап сорауларга туктаусыз җавап эзлибез ич. Шуның белән кызыклыдыр да бәлки гомер дигәннәре...