Чәчкә үстерә белү үзе бер сәләт

Тышта ата кыш... Яз аена кердек дигәч кенә кыш карларын да яудырып, суыкларын күрсәтеп өлгерергә ашыкты.
Әмма барыбер яз сулышы сизелә, тәрәз төпләрендә утырган гөлләргә күз салыгыз әле. Алар уяна, җанлана, яшәрә, шулаймы? Яран гөлләрем бихисап яшь ботаклар чыгарган, барысының да үсәсе, яңа тормышка җан өрәсе килә. Нишләптер яран гөлләрен яратам, алар талымсыз, матур итеп чәчкә ата, чәчкәләренең, яфракларының формалары буенча алар әллә күпме төрле! Үземдә булмаганнарын алып үстерәсе килә. Шулай бервакыт интернетта чәчкә үстерүче Римма Гафаровада яран гөленең миндә булмаган бер төрен күреп алдым. Аның белән танышырга дип озак җыенып йөрдем. Ниһаять, күптән түгел хыялым тормышка ашты: Римма апа өйләренә чакырды. Ә анда исең-акылың китәрлек! Кечкенә күзәнәкләрдән, орлыклардан, яфраклардан чәчәкләр патшабикәсе гөлләр үрчетә. Моның өчен бар нәрсә җайлаштырылган: савытлар, киштә, яктылык, төрле зурлыктагы стаканчыклар. Һәр савытка гөлнең сорты язып куелган. Гөлләре турында Римма апа шундый ләззәт белән сөйли, аларны ихлас күңелдән яратуы сизелә, эшенең матур нәтиҗәләре дә күренеп тора шул. Глоксиниянең нинди генә төре юк! «Октябрьскийда глоксиния үрчетүчеләр күбәеп китте, — ди Римма Нигъмәтбай кызы, — шуңа да соңгы вакытта стрептокарпус үстерүне өйрәндем. Әнә чәчкә дә атып булыша берсе», — дип горурланып, сак кына кечкенә гөлдән чыккан чәчкәне күрсәтте.