Шигъри җанлы шәһәрдәшем

Тирәбездә ачык йөзле, киң күңелле кешеләр була. Шундый кешеләрнең берсе — гомерен балалар укытуга багышлаган Зәйтүнә Нәҗметдин кызы Хәсәнова.
Ул Ярмәкәй районы Иске Турай авылында туып үсә. Авыл мәктәбендә урта белем алгач, Стәрлетамак педагогия институтының математика факультетын читтән торып тәмамлый. Хезмәт юлын Бәләбәй районының Байморза авылында башлап, 23 ел буена балаларга төпле белем, тәрбия бирә. Шул авылда Римир исемле егеткә кияүгә чыга. Язмыш җилләре аларны Төрекмән авылына алып килә. Биредә дә ул күп еллар 11нче мәктәптә физика һәм математика укыта. Хәләле белән берсеннән-берсе матур дүрт кыз үстерәләр. Алар инде хәзер һәрберсе үзләренең тормыш юлларын сайлаган. Римир абыйның бакыйлыкка күчүенә дә 10 ел гомер узып киткән.
Зәйтүнә апа белән без шәһәрнең 1нче хастаханәсендә таныштык. Урыннарыбыз бергә туры килеп, сөйләшеп киттек, күптәнге танышлар кебек аралышып, тиз арада якынлаштык. Ямьле 9 Май көнендә очрашып, елый-елый бергә бәйрәм концерты карадык. Баксаң, без икебез дә шигъри җанлы, нечкә күңелле булуыбыз белән охшаш булып чыктык.
Зәйтүнә апа миңа үзенең китапларын бүләк итте. Ул шигырьләрне мин кат-кат укыдым. Анда шагыйрәнең сабый баладай самимилек белән йөрәккә үтеп керердәй шигырьләрендә яшьлек еллары, дус-ишләре, туган-тумачалары турында горурланып, сокланып язылган.
Тирәбездә шундый шигъри җанлы, изге күңелле кешеләр булганда тормыш та яктырак һәм күңеллерәк тоела, дөньялар имин генә булсын. Зәйтүнә Хәсәнованың бер шигырен сезгә дә тәкъдим итәм.