Туган як
+31 °С
Болытлы
Барлык яңалыклар
Әдәби бит
17 ноябрь 2017, 12:58

Шигърият

Көзләремдә йөрим күптән,Көзләрем — көзләргә хас.Бер шатлыклар урап алса,Әле сагыш һич узмас.

Көзләремдә

Көзләремдә йөрим күптән,
Көзләрем — көзләргә хас.
Бер шатлыклар урап алса,
Әле сагыш һич узмас.
Көзләремдә йөрим күптән,
Чуар көзләр — хозурлык!
Әле сәяхәткә чыгам,
Әле япа-ялгызлык.
Көзләремдә йөрим күптән,
Күреп төрле илләрне.
Балалар, оныклар белән
Сизмим узган көннәрне.
Чит якта да дусларым бар
Күрешеп сөйләшергә.
Яңалыклар уртаклашып,
Бергәләп гөрләшергә.
Көзләремдә йөрим күптән,
Шөкер, дип гомерләргә.
Хатирәләр яңартамын
Еш кайтып яшьлегемә.
Балачагым һәрчак истә,
Көзләремдә йөрсәм дә.
Әткәм-әнкәм, туган ягым
Истә кайда барсам да.
Көзләремдә йөрим күптән,
Хатирәләр туплыймын.
Чуар булса да көзләрем
Һич тормыштан туймыймын.
Йөрим әле көзләремдә...
Хозурлыкка сокланып,
Бер шатланып, сагышланып,
Табигатьтән ямь алып.
Көзләремдә йөрим әле...
Уйларым якты, матур.
Гомер йомгагымны сүтәм,
Үкенерлек түгел, шөкер,
Көзләрем чуар, матур!


Ә. ЗИННУРОВА.

Без көчлеләр
Мин игенче булмасам да
Төшмәдем җиргә күктән.
Шулай да аера алам
Арыш басуын чүптән.
Көннән-көн нык күбәяләр
Кысыр калган басулар.
Сулышларымны кысалар
Йөрәк тулы ярсулар.
Мул уңышлар үстерәбез,
Җыябыз, мактанабыз.
Сакларга урын эзлибез,
Тапсак... и шатланабыз.
Эш тә булды, аш та булды
Колхозлар бар чагында.
Ялан тулы маллар иде,
Мул ризыклар табында.
Әзер уңышны игенче
Аткарыр урын тапмый.
Бер кечкенә түрәнең
Бусагаларын таптый.
Басуларда котырынып
Үсә шайтан таягы.
Әйтерсең, монда басмаган
Күптән кеше аягы...
... Кайда, ничек яшәсәк тә,
Без бит Җир кешеләре.
Баһадирлар туа җирдә,
Яши иң көчлеләре.
Юкка килмәдек без җиргә,
Яшик дустанә бергә.

Т. ИДРИСОВ.


Читайте нас: