Өйдә уку галәмәтләре...

6 апрельдән Башкортстанның барлык мәктәпләре дистанцион укуга күчте.Коронавирус пандемиясе аркасында 450 мең укучыга виртуаль парталар артына утырырга туры килде. Укыту дүрт юнәлештә оештырылды: сайтлар аша, электрон почтага җибәрелүче яки өйгә китереп бирелүче биремнәр буенча, шулай ук дежур сыйныфлар ярдәмендә. Электрон платформалар йөкләнешкә түзмәдеДистанцион укуга күчүнең җиңел булмаячагы беренче көннән үк аңлашылды. Интернетка бер үк вакытта меңнәрчә укучыларның чыгуын система күтәрә алмады һәм … «җимерелде». Әйткәндәй, онлайн укытуда җитди техник мәсьәләләр барлыгы тестлау вакытында ук беленгән иде.— Русия цифрлы белем бирү платформалары эшен тикшерү өчен, 5 апрельдә 150 мең бала, 9 меңгә якын укытучы, 14 муниципалитет 12.00дән 13.00 сәгатькә кадәр системаны йөкләде. Күп мәктәпләр кулланган «Русия электрон мәктәбе» порталы тест үткәргәндә үк катып калды, белгечләр әйтүенчә, «ятты». Беренче дистанцион уку көнендә бу хәл кабатланды. Башка төбәкләрдә дә шундый ук мәсьәлә, — диде мәгариф министры Айбулат Хаҗин.Бер үк вакытта 1 миллионнан артык тоташтырулар нәтиҗәсендә «Мәгариф» автоматлаштырылган системасы эше туктап калды. Бу уңайдан министр интернет белән актив кулланган ата-аналарга порталга керүне чикләргә тәкъдим итте. Айбулат Хаҗин хәбәр иткәнчә, видеоконференцияләр белән бәйле барлык системалар (Hangouts, ZOOM, Skype) эшли. YouTube бик яхшы эшләгән, анда укытучылар үз дәресләрен трансляцияләгән. Шунысын да билгеләп үтәргә кирәк, өзеклекләр шулай ук башка ике популяр платформада теркәлде. Учи.ру күп сандагы кулланучыларны техник яктан хезмәтләндерү мөмкин түгеллеген белдерде. Ә Я.Класс яңа укучыларга сайтка керүне иртәнге 11.00дән 17.00 сәгатькә кадәр чикләде. Серверларны күтәрергә!Башкортстан Башлыгы Радий Хәбиров җимерелгән серверларны күтәрергә кушты.«Мондый төр укыту безнең тәҗрибәдә беренче мәртәбә кулланыла, без, асылда, гадәттән тыш шартларда эшлибез. Шуңа күрә яңа алымнар эзләгез, юлын табыгыз. Югыйсә, балаларның укырга теләген гомумән бетерәсез,» — дип билгеләп үтте төбәк җитәкчесе.Җитешсезлекләр белән бәйле укытучыларга дистанцион укытуның икенче төренә — электрон кейсларга күчәргә кушылды, алар хәзер укучылар белән электрон журнал, электрон почта яки мессенджерлар аша аралаша. Мәктәп чатында мәхшәрВатсап һәм башка социаль челтәрләрдәге сыйныфлар төркемнәрендә дистанцион укулар башлангач, чын мәгънәсендә мәхшәр булып алды. Ата-аналарның халәтен аңлау өчен түбәндәге берничә фикерне уку да җитә...«Беренче дәресне әле үткәрә алдык, аннары тавыш, видео юкка чыкты, укытучы бәйләнешкә чыга алмады, элемтә бөтенләй өзелде»...«Балалары урта яки югары сыйныфта укыганнарның әле күңелләре бераз тыныч булды. Уку өчен тиешле платформаларга керергә әти-әни ярдәме кирәк булмады. Ни дисәң дә, алар аңлап эшли.Ә менә башлангычлар өчен, бу эш тулаем әти-әниләр җилкәсенә төште. Гаиләдә берничә бала һәм аның өстенә әти яки әниләре, я икесе дә укытучы булган йорттагы хәлне күз алдына китерүе кыен түгел».«Авыр, җаваплы чорга ничек тә аяк бастык шикелле. Беренче мизгелләрдә чәчләр үрә торды, күңелгә «күрәселәр бар икән», дигән уйлар да килде, интернетта булашып, хәтта ашарга пешерергә дә вакыт булмады».«Шөкер, бездә видеоэлемтә яхшы эшләде, укучылар конференция һәм чатларга чагыштырмача җиңел керә алды». Шәһәрдәшләр нинди фикердә?Дистанцион укыту башланган мәлдә күзалланган шартлар урынына, үз сыйныфлары белән аралашуның башка юлларын эзләргә мәҗбүр булган укытучыларга да җиңел булмагандыр. Кайбер педагоглар хәтта дәресләрне «ВКонтакте»да турыдан-туры эфирлар аша үткәрүне кулай күрде. Икенчеләр ватсап аша биремнәр бирде, өй эшен тикшерде.Шәһәрдәшләр онлайн укуга кагылышлы яңарышларны ничек кабул иткән икән? Моны ачыклау өчен укытучылар, укучылар һәм ата-аналар фикерен тыңлап карыйк.Е. Колбасова, 2нче гимназия укытучысы: «Дистанцион укыту нәтиҗәлеме? Әлегә бу хакта сөйләргә иртәрәк, әмма килеп туган мәсьәләләргә карамастан, мондый укытуның уңай якларын да билгеләп була. Мәсәлән, балалар онлайн укуда гадәти дәрестәгедән зуррак активлык күрсәтә. Бәлки, моңа өйдәге шартлар да тәэсир итәдер. Моннан тыш, балалар шаяруга, партадашы белән сөйләшеп алуга игътибарын юнәлтә алмый. Офлайн тәртиптә эшләү дә файдалы: ул укучыларга уңайлы вакытта уку әсбапларын карарга мөмкинлек бирә. Моннан тыш алар мәгълүмат технологияләрен кулланып, өстәмә белем туплый».Э. Мөхәмәтҗанова, 9нчы сыйныф укучысы: «Мәгълүмат технологияләре үсешенә бәйле, без бүген дистанцион рәвештә укый алабыз. Бу зур мөмкинлекләр ача, үзебез өчен мөһим булган белем өлкәләренә күбрәк игътибар бирергә, камилләшергә ярдәм итә. Минемчә, дистанцион укуның иң мөһим өстенлекләренең берсе — ул универсальлек. Белем алу өчен нибары компьютерны кабызырга, виртуаль конференциягә кушылырга яки сылтама буенча күчеп, дәресне карарга кирәк. Мондый укыту системасы киләчәктә зур таралу алыр дип уйлыйм».А. Данилова, 9нчы сыйныф укучысы:«Интернет киңлекләрендә «гизәргә» яратучы 21нче гасыр балалары өчен дистанцион уку бер ләззәт кенә. Онлайн дәресләр кызыклырак һәм файдалырак та, аларда мөһим мәгълүмат күбрәк кебек. Шул ук вакытта өйдә уку бик уңайлы, дәресне хәтта авырган вакытта да үзләштерә аласың».