Прокуратурада 15 минут

Прокуратурада хезмәт итүчеләрнең көн тәртибе минутлап бүленгән. Монда җитди, уйчан, үз-үзләренә таләпчән кешеләр эшли. Әмма һөнәри бәйрәмнәре уңаеннан очрашып сөйләшергә дигән ниятемне кире какмадылар: 15 минут вакыт табылды.
Ел башында гадәттәгечә узган елга йомгак ясыйлар, нинди генә тармакны алма бар җиргә хас үзенчәлек бу. Безнең шәһәрдә прокурор вазыйфасын вакытлыча башкаручы Денис Агапитов белән бүгенге әңгәмәбез дә 2017 елдагы эш нәтиҗәләре турында.
— 2017 ел чагыштырмача тыныч булды. Тыныч дигәч тә, прокуратурада эш бетеп, кулларын кушырып утырганнар икән дип уйламагыз. Резонанслы, зур-зур томлы җинаять эшләре теркәлмәде дигән сүз ул. Мәсәлән, 2016 елда аеруча авыр 10 җинаять эше алып барылган булса, узган елда, бәхеткә каршы, андый хәл булмады. Законнар буенча ел да үзгәрешләр булып тора. Генераль прокуратура тарафыннан эшебезгә таләпләр артты. Хәзер тикшерүләрнең күбесе прокуратурадан алынды. Без башлыча хезмәт хакы түләнмәү, коррупция буенча оештырылган тикшерүләрдә катнашабыз. Чөнки күзәтчелек итүче (экологический надзор һ. б.), һәр тармак буенча төрле инспекцияләр (жилищная инспекция һ. б), бихисап күп оештырылды, прокуратура шушы хезмәтләрнең эшен күз уңында тотарга бурычлы.
Тәүге тапкыр җинаять кылган (караклык, мәсәлән) кеше җинаять җаваплылыгына тарттырылмый, аңа иң элек административ җаваплылык каралган. Әгәр шул ук кеше кабат закон боза икән, шул чагында гына без аны җинаять җаваплыгына тарттырырга хокуклы. Монысы да бер үзгәреш эшебездә.
Халыктан килгән дәгъвалар саны кимеде. Моны без халык белән оештырылган кайнар элемтәләр, шәхси очрашулар нәтиҗәседер дип уйлыйбыз. Безнең эш өндәмәсе — мөмкин кадәр халык белән күбрәк аралашырга, очрашырга, аңлату эше алып барырга. Күп нәрсә законнарны белмәгәннән килеп чыга.